大圍街市無裝冷氣如蒸籠　食署拖2年未施工

「呢到夏天熱起上嚟室內都有成36度架！熱到啲豬肉都變壞得好快，開風扇又驚吹乾啲豬肉，睇落去就唔靚，就要掉咁啲！每年夏天都有一、兩成損失！」大圍街市肉檔檔戶張先生坦言，高溫不僅令檔戶及前往光顧的街坊感難受，更讓豬肉快速變壞，蒙受損失。日前記者往該街市量度，室內亦有逾攝氏33度的高溫，不少檔戶汗流浹背。另外，張又稱，因長時間啟動多把強力風扇降溫，每期高昂的電費更令經營百上加斤。

有逾30年歷史的大圍街市內有約170個攤檔，為區內居民「買餸」首選的地方，惟因欠缺冷氣設備，而被「睇低一線」。大圍街市互委會主席張小姐坦言，現時居民都較為偏向到同區有冷氣的街市或超級市場，令該街市競爭力相對削弱，「啲檔戶真係要不停飲水、換衫，我哋都聽過有街坊話夏天就唔嚟住喇，情願去遠啲，去個有冷氣嘅街市！」

「大概早喺2年前佢哋（檔戶）都已經簽晒名同意裝冷氣，但依家仲冇確實工程時間表！」沙田區議會地區設施管理委員會委員董健莉指出，當時已獲89%檔戶同意為街市安裝冷氣，且承諾日後共同承擔相關費用，惟及後食環署一直停留於諮詢及設計階段，現今只答允安裝工程，並未有確實安裝冷氣時間表。

「大圍街市喺沙田區內係重要嘅街市，檔戶早幾年前已經表達咗同意加冷氣，食環搞諮詢、搵顧問呢啲根本可以好早完成，點解仲要傾到下年先再行下一步呢，依家仲要等設計、招標再遞文件上立法會撥款，搞得嚟都預計要3年之後先施工完成，完全冇辦法接受點解咁慢！」立法會議員鄧家彪嚴斥食環署處事疏懶、無理拖延，對於優化街市問題處理欠缺積極。

食環署發言人表示，正就該街市加裝冷氣的可行性諮詢街市管理諮詢委員會及持分者，待有最終採納方案，會要求建築署進行全面技術可行性研究。經考慮各技術因素後，當局會決定是否申請撥款，以加裝冷氣。