博康邨街市老化 檔戶迫開半日市

20150915
東網電視
更多新聞短片
有市民指博康邨街市老化,既無冷氣,天花亦出現石屎剝落。
「以前我哋呢度都好旺,自從附近街市整咗冷氣,我哋呢度就靜咗好多!」於沙田博康邨街市經營豬肉檔的廖先生表示,該街市曾有過風光日子,惟自附近街市安裝冷氣後,人流大減,加上天氣炎熱,街市欠缺冷氣會令肉類容易變壞,故現時只做上午生意,生意額較附近街市安裝冷氣前大跌近6成,「淨做上晝,都熱到我要換幾次衫!次次續約都加租,我哋租就交足1日,但生意就只做半日,你話淒唔淒涼。」
博康邨居民吳女士亦直言,因天氣炎熱,導致街市內食材有欠新鮮,故現時每日均會到附近沙角邨街市購物,「個街市已經細,商場又係,我情願行遠兩步,去沙角邨嗰邊又有冷氣,啲魚都新鮮啲。」
記者到場視察當日室外氣溫約30.4度,惟街市內的氣溫竟逾31度,較室外氣溫更高。縱然街市走廊已設有風扇,但不少檔戶亦於檔內自設風扇,有肉檔更加設冷風機以防肉類變壞。記者又發現街市天花有部分石屎剝落,露出鋼筋。
房署發言人表示,去年曾詳細研究於街市安裝冷氣一事,惟結果顯示安裝冷氣屬大型改裝工程,需要改動樓宇設計及覓地加建供電設施及冷氣機房等,在技術上不可行,故未能進行安裝冷氣工程。就天花石屎剝落,發言人則指去年底已進行實地勘察,並於今年初移走有鬆脫迹象的石屎,有關維修工程需與各受影響檔戶商討,於不影響其生意運作的情況下進行,現已安排於今年年底前進行。
「成個地方都係房署嘅地,有乜理由分配唔到啲地方出嚟,有心做點會做唔到?」一直跟進事件的當區區議員陳國添狠批,房署明知該街市營商環境每況愈下,彷如「死城」,卻一直愛理不理,縱然約2年前曾與檔戶開會表示會活化街市,惟一直「只聞樓梯響」。陳又質疑房署早年將沙田及馬鞍山區街市賣予領展,惟獨博康邨街市仍屬房署管理,令其慘成「孤兒仔」,認為街市數量減少應更易管理,要求當局盡快落實活化方案,締造良好的營商環境予市民及檔戶。