「偷鐵黨」肆虐尚德邨　3日失40水龍頭

「我都聽到樓下保安講話畀人偷咗水龍頭，有廿幾層都畀人偷咗，但都冇即時發現，畀佢走甩，呢度成個無掩雞籠咁，賊人可以自出自入，我覺得成個保安系統真係唔足夠！一陣入埋屋偷嘢點算！」尚德邨尚明樓居民何太指，除地下大堂設大閘外，4樓平台亦設有另一出入口通往停車場及商場，雖設有密碼鎖大門及閉路電視，惟無保安看守仍難保障居民安全。「呢個（4樓）出入口好多人出入，雖然有閉路電視駁去樓下大堂保安會睇到，但保安1個人邊睇得晒咁多嘢，好易走漏眼！」

然而，該大廈保安確實令人憂慮。按房署資料，上址保安員於8月18日及20日巡邏時，發現前、後樓梯的洗地用水龍頭被盜，共損失約40多個一字型銅製水龍頭，已報警處理。另外，警方資料亦顯示，上址除該批水龍頭損失外，今年8月亦接獲3宗有關電箱門及水龍頭被刑毀的報告，而過去4年，警方亦接獲1宗發生於上址的偷竊案，涉事的單位報稱共損失總值逾4.6萬元。

西貢區議會社會服務及健康安全城市委員會委員簡兆祺狠批，房署以資源不足及龐大耗資為由，拒絕於4樓平台加設保安員看守，亦拒絕於樓層後樓梯加裝閉路電視系統，罔顧居民性命財產安危。「4樓平台雖然有密碼鎖同閉路電視，但如果賊人跟住啲居民尾入咗嚟，個賊做任何嘢我哋都控制唔到！我哋曾經喺區議會同房署傾過，佢話要全邨加保安員個費用龐大而拒絕，冇理由錢仲緊要過啲居民生命！」

房屋署發言人指，尚明樓4樓平台出入口已有電子密碼鎖及閉路電視，所有人士必須使用密碼方可進入。閉路電視亦已連接到大堂保安崗位，以便保安員密切監察進出情況，故毋須於4樓平台額外加設保安崗位。發言人續稱，邨內重要設施位置均已加設閉路電視系統以保障居民安全，其他公共位置設施亦有保安員定時巡查，及由於後樓梯地下出入口已有閉路電視，暫時未考慮於每層後樓梯加設閉路電視。

警方發言人則指，有關案件已交由觀塘警區刑事調查隊從多方面進行調查，希望盡快將罪犯繩之於法。