香港隊作客馬爾代夫　贏1：0全取3分

香港又贏一場！世界盃亞洲區外圍賽，香港隊作客馬爾代夫，上半場開波初段被主隊攻到氣咳，好彩基藍馬護空門力保不失；轉頭保連奴博得12碼，之後親自操刀射入，為港隊建下奇功。換邊後港隊辛祖有多次機會增添紀錄，但都未能把握，不過無阻港隊贏1:0，全取關鍵3分！

香港教練金判坤，以艾力士打最前，陳七(陳肇麒)於右邊活動，一開波主隊就壓住香港打，隊長艾舒費於中場不斷策動攻勢，9分鐘，前鋒鴨都拿笠射過「英雄輝」，好彩有基藍馬護空門，香港力保不失；11分鐘，香港保連奴殺入禁區，被對手門將穆罕默德侵犯，球證直指12碼點，保連奴親自主射，射了掛網波，香港於劣勢下打開紀錄，領先1:0。之後主隊繼續壓住打，多次於港隊禁區頂製造險象，不過埋門把握力較差，未能威脅門將葉鴻輝。完半場前主隊於禁區頂得罰球，但艾舒費一射射斜，半場港隊領先1:0。

換邊後，香港教練金判坤接連換人，先以梁振邦換走艾歷士，之後再用麥基換走有傷在身嘅陳七。68分鐘，麥基壓落底線右腳傳中，保連奴殺到但係慢咗少少，左腳射到個波，但柱邊出界，香港未能拉開紀錄。72分鐘，香港辛祖於禁區外起右腳怒射，個波勁就勁喇，但角度太正，被主隊門將擋出。

馬爾代夫踢到後半段，多名球員有體力不繼情況，但憑死球都曾於港隊門前製造唔少險象，好彩未能把握。85分鐘，陳俊樂左路壓落底線，辛祖門前一撞竟然越楣而去。90分鐘，主隊烏美亞於禁區內一頂，僅僅柱邊斜出。港隊力保1:0勝果，攞晒3分！

港足再勝一仗後緊守C組次席，小組形勢亦進入決定性階段，香港隊在小組尚餘最後兩場賽事，分別是下周二(17日)對中國，以及明年3月對卡塔爾，仍保持出線機會。

根據世界盃外圍賽亞洲區20強賽賽制，8個小組的首名直接出線，加4支最佳成績次名，合共12隊進身下一圈外圍賽。C組榜首的卡塔爾現有15分而尚餘三場賽事，分別對不丹、香港及中國，首名出線機會甚高，排第二的香港則必須在餘下兩場擊敗中國及卡塔爾，再望卡塔爾失分才有機會首名晉級，否則只能爭取次名出線機會。

排第3位的中國由於少踢一場，只要下周二戰勝香港便可憑較佳得失球升上第二，再於最後兩場決戰馬爾代夫及卡塔爾，爭奪出線資格。

C組形勢

球隊/積分/尚餘對手

卡塔爾/15分/不丹、香港、中國

香港/13分/中國、卡塔爾

中國/10分/香港、馬爾代夫、卡塔爾