瘋搶$1洗衣機跑甩鞋仆親　工展會安排亂招怨

工展會今早(12日)11時開幕，不少市民通宵「瞓街」等候入場搶購工展會「一蚊」超筍價貨品，但大會安排引起市民不滿。在開幕前數分鐘突將人龍分成數行，造成有人「遲嚟先上岸」，引起排頭位輪候者埋怨，更有市民在開閘後狂跑往攤檔時仆倒。推出「一蚊」洗衣機的展商吸取去年經驗，加裝鐵馬並增設派籌等安排，認為整體流程順暢。

約50名市民今早9時許，已在天后興發街入口排隊等候入場。排頭位的蘇小姐昨日下午4時排頭位，說「屋企部洗衣機咁啱壞咗」，故準備一元買部洗衣機。接近開幕前數分鐘，大會將人龍分成數行，引起蘇小姐不滿，批評大會安排混亂，「好多老人家都畀人逼咗去後面，好多人今朝先嚟都行前咗，咁我唔使咁早嚟排啦！」

之後逾百名市民在開閘後一湧而上，衝向一元洗衣機的展攤，過程中有人跌倒及混亂。排頭位蘇小姐跑輸未能購得洗衣機，反是一位排第5名的黎先生進場後獲取籌號一元買洗衣機，也批評大會應在場外排籌，而「仆住搶購」的李先生最終如願購得平貨，笑言對鞋太鬆才跌倒。