荃灣車位不足　違泊亦一位難求

「諗住擺低架車喺如心廣場就上去飲，點知停車場爆滿，兜去附近啲商場一樣都爆，點知喺街違泊都爆埋，成個區根本就唔夠車位！」馮先生早前駕車與親友前往如心廣場參加飲宴，並未駛至停車場入口，已發現數十米車龍在馬路中心輪候，車龍嚴重堵塞行車幹道，只好先行讓親友下車，再駛往其他地方尋覓車位。

馮先生先後駛至附近各條主要道路，包括青山公路荃灣段、沙咀道、馬頭壩道及楊屋道等，均無法覓得泊車位，最後被迫將車輛違泊在工業區的柴灣角街，再自行徒步近20分鐘返回如心廣場，「周街都係違泊唔係因為啲車主唔肯畀錢泊車，而係根本唔夠位，政府係咪應該要做好啲規劃？」

警方發言人證實，過去1年在荃灣區已向違泊車輛發出約5萬1千張定額罰款告票。

運輸署發言人表示，一直鼓勵市民使用公共運輸服務，而政府目前提供泊車位政策是盡量優先考慮及配合商用車輛的泊車需求。以不違背上述原則下，各區會提供一定數量的私家車停車位，並在規劃發展時，要求發展商在合適的新發展項目內額外設置適量的公眾泊位，供有短暫泊車需要的車輛停泊。發言人稱，荃灣區的的車位數目由2012年至15年10月間，增加了85個泊位，又指現時臨時停車場平均夜間使用率為7成，認為車位尚有剩餘空間。

「荃灣收番嚟起樓嘅地，起好後只需要符合城規會停車位數目最低門檻，根本就冇諗到荃灣其實好多區外嘅人會嚟，咁少車位係唔會夠！」荃灣區議員羅少傑批評政府將「爛地場」及多層停車場等土地收回建屋後，未有相應政策增加足夠泊車位。另外現存停車場在設計上亦有欠妥善，每當停車場爆滿，車輛必須佔用公眾道路等候，嚴重堵塞區內交通。

「多咗車位只係計政府同商場啲位，冇咗爛地場之後嗰幾百個位都冇計入去！」羅少傑更指無法理解運輸署平均7成使用率的由來，更擔心當近海一帶的新樓宇入伙後，違泊及等候進入停車場的車龍造成交擠塞等問題會繼續惡化，要求有關當局正視問題，解決區內車位不足情況。