「第2間巴士公司嗰個APPS（手機應用程式），會講明之後3班車大約幾時會到站，唔使盲摸摸，點解新巴同城巴仲未做到？」李先生指，新巴及城巴現時提供的巴士實時抵站系統只適用於小量路線，大部分巴士線的班次則要「估估吓」，因此只能在街上呆等，加上時有脫班，導致經常大失預算，「企喺度凍到變雪條都唔敢行開，路邊又多廢氣同大塵，好似做咗人肉過濾器咁！」

李認為，運輸署應在專營權條款中，要求巴士公司引進有關系統至其餘路線，「巴士唔係自由市場，接近係獨市生意，乘客好多時係冇得揀。運輸署批個權出嚟，淨係得佢夠牙力傾。」

新巴及城巴發言人表示，現時乘客可透過手機應用程式及網頁，查詢新巴人力車觀光巴士H1線全日班次，及所有城巴機場快線於45分鐘內的實時抵站時間。發言人又指香港島及過海巴士網絡專營權（專營權一）的新專營權會於今年6月展開，承諾會在展開後兩年內設置巴士實時抵站系統，其後會將系統擴展至新巴和城巴的機場及北大嶼山巴士網路（專營權二）路線。

發言人又解釋，由於大部分路線行經繁忙路段，遊行、大型活動、交通意外、違例泊車及道路維修工程均會造成突發性交通嚴重擠塞，已不斷檢討及修正巴士運作時間表。

運輸署發言人則證實，15年共接獲逾1500宗有關兩巴脫班或延誤的投訴，而同年與城巴商討專營權條款時，已獲承諾將分階段引入實時巴士資訊系統，預計於18年內完成。發言人又指，去年批准兩巴調整行車時間及班次的申請後，有關路線脫班及延誤已有改善。

「啲條款次次都係大同小異，同出現『滯後』，有啲科技面世咗好耐，先至要求引入。同埋規劃明益港鐵，巴士營利空間下降，亦令啲公司冇咩動機提升服務。」立法會交通事務委員會委員范國威批評，運輸署鮮有藉專營權談判督促巴士公司改善服務，加上運輸政策優待鐵路系統，令本港巴士服務漸見落後，「兩巴啲巴士好早就有GPS（全球定位服務功能），技術上應該冇大困難。因為運輸署冇咩要求，又係獨市生意，先會咁懶懶閒。」