你要知：棉被塞入黑膠袋　殺滅塵蟎好easy

近日天氣和暖，相信唔少人都忙於收拾厚衫厚被，做好轉季準備。不過，喺收起棉被前，梗係要先清潔一下，殺滅被上面嘅塵蟎同細菌。咁究竟要點清潔？直接放喺太陽底下晾曬，又驚空氣污染，愈曬愈污糟；用水洗又驚搞到張被無以前咁暖。東網記者專程找來洗衣店負責人，教大家處理棉被嘅基本知識，咁就包無錯啦！

清潔棉被主要有3種方法，分別係濕洗、乾洗，同以高溫焗被。陽光洗衣集團總監江麗萍(Apple)就教路，棉被平均每年要清洗1次，不過，不同棉被需要用不同方法清洗，切勿撈亂，「如果係羊毛被，一定要乾洗，濕洗會令被內羊毛纏結，之後乾咗再冚就會無咁暖。」至於羽絨被，即分為兩種，如果係純羽絨被，亦不適宜濕洗，如果被芯有其他物質，就可以留意返被上嘅標籤，睇清楚係咪可以濕洗。

至於焗被，就係使用高溫，殺死棉被上嘅塵蟎，原理同放於太陽底下晾曬相若，無論係邊一種被，都可以使用呢個方法。除咗到洗衣店焗被，坊間仲有另類焗被法，用黑色垃圾膠袋將棉被包好，再放於太陽底下晾曬，利用黑色吸熱特性，加上密封膠袋鎖住溫度，便可輕易達到攝氏50度高溫，輕輕鬆鬆殺滅塵蟎，仲唔驚整污糟添！大家不妨一試。

清洗完又點儲存？Apple指，只要將被放於防塵、透氣袋內，再置於乾爽地方即可，不過她提醒，應避免抽真空儲存棉被，「被會暖就係因為棉同棉中間有空氣，如果抽走晒空氣，壓實晒啲棉，就算之後拎返出嚟，都會無之前咁暖。」她又提醒，大部分洗衣店都提供清洗棉被服務，部分更可代為儲存。