搜查線:尋童年回憶 90後情侶的鞦韆地圖
遊樂場內的打鞦韆,滿載不少人兒時的回憶,惟這個曾經標誌着快樂的遊樂設施,亦難敵時代巨輪,漸漸湮沒於都市之中。兩個90後為記錄即將消失的集體回憶,踏遍香港各區,尋找僅餘的鞦韆位置,更於facebook開設專頁,與一眾同好分享,交流有關鞦韆的點滴。
「其實除咗大家常見嘅U字型同橫版形鞦韆外,仲有好多唔同種類,例如係搖椅、球形等,即使畀小朋友玩嘅鞦韆,都有幾種唔同類型。」網名「鞦韆先生」及「鞦韆小姐」的90後情侶,分別從事飲食業及仍在就學,對鞦韆可謂情有獨鍾,究竟當初他們為何會開始這個尋找鞦韆之旅?
「細個成日同屋企人落公園玩,其中最鍾意就係玩鞦韆,因為屋企人可以喺後面推我,大家感覺更加close。」鞦韆先生指,小時候對鞦韆已經有着情意結,雖然隨年紀漸長,玩的次數亦愈來愈少,但前年年底他到公園閒坐時,卻發現舊時最愛的玩意,已靜悄悄地消失,「當時上網搵,發現好多人都有類似經歷,話屋企附近嘅鞦韆已經拆咗,想玩都無得玩。」
二人自此開始到香港各區,尋找仍隱藏於市的鞦韆,足迹遍布港九新界甚至離島,至今已找到約70個鞦韆,當中大部分由政府興建,亦有部分由私人機構或民間搭建。其中,青衣自然教育徑的木板鞦韆,可謂鞦韆先生的最愛,「呢個鞦韆喺山頂位置,一路盪一路可以遠眺海邊同青馬大橋,風景真係好靚。」
雖然趕得及為不少鞦韆留影,惟要消失的始終留不住。如元朗一個球形鞦韆,對鞦韆小姐而言可謂至為特別,惟開放半年後,近日亦已被拆卸,「之前聽人講坪洲有一個樹鞦韆,我哋特登入去搵,搵到人哋講嘅位置,但鞦韆已經消失咗。」
他們希望,能親身到訪全港各個鞦韆,並把資料製作成「鞦韆地圖」,讓同樣喜歡鞦韆的人,拾回舊日的歡樂,「依家全香港大概有200幾個鞦韆,同90年代高峰時嘅接近500個相比,只係得一半左右,相信之後只會愈嚟愈少,希望大家可以珍惜呢啲慢慢消失嘅集體回憶。」