生活通識：沙膠擦原子筆跡　錯足幾十年！

擦紙膠、又名膠擦，大人細路都總會用過擦走鉛筆字，其中一種硬身叫做「沙膠」，就係專門用來擦走原子筆字……如果你都係咁諗就錯晒啦！近日有外國傳媒報道，原來沙膠都係用來擦走鉛筆字，不過就主力擦去寫在較厚或較粗糙的紙張上。消息可謂顛覆了一直以來的知識，問題當年係邊個誤導我，整到擦爛咁多張紙！

不少人在小時候或是讀書時，都有用過這種整個立體平行四邊形的雙頭擦紙膠，一邊紅一邊藍，紅色部分較軟身，用來擦走鉛筆字，而原子筆墨因會滲入紙張表層，而沙膠通常硬身，故能擦甩紙表層，連帶擦走原子筆跡，不過擦完通常連紙都會薄埋，一不小心就會整穿張紙。外國媒體報道，藍色沙膠部分原本設計用作擦去較粗糙紙張上的鉛筆字，例如在卡紙或木紋紙上，甚至並非畫在紙張上的鉛筆字。

翻查紀錄，早在1770年已有英國化學家發現一種可以擦去鉛筆字的植物膠，至1858年一名美國費城市民將擦膠嵌入鉛筆尾部而取得一項專利，但後來該設計被判定只是將兩項已有的東西混合一起，而非新產品，最終該專利被取消。如果事件屬實，即過去246年來從未有人為原子筆字發明「原子筆擦字膠」，只是「民間智慧」把沙膠用途轉到擦走原子筆字跡，印證了「窮則變、變則通、通則達」的道理。

但時至今日，再出現用原子筆寫錯字，相信大部分人已會改用塗改液或者改錯帶。