搜查線：古老上契求平安　老樹石碑都契得

有不少父母生小朋友後，都會將子女與好朋友上契，拉近雙方關係。不過，上契原來有好多種，除了與人上契，契神仙、契老樹甚至契石碑，你又聽過未？據稱，與神仙、老樹或者石碑上契，都可以祈求小朋友健康成長。

身邊朋友有契爺契媽並不為奇，不過與神仙、老樹或者石碑上契，不少新一代都感到十分奇怪。市民陳先生話，「未聽過，自己都無同人或者神上契。」陳小姐亦對契大樹或者石碑這些東西感到十分驚訝，「唔知呀，屋企人都無呢個習慣。」

為了揭開上契謎底，東網記者到嗇色園黃大仙祠了解。黃大仙祠解籤師傅黃金口解釋，「契神」為傳統的祈福習俗，寓意為保佑小朋友。「契人是非多，所以會契神仙，好多父母會喺小朋友出世滿月之後就會上契。」而結婚後，則要進行「脫契」儀式。「結咗婚，即係成人啦，意思係大個仔大個女，多謝大仙咁多年嚟嘅照顧。」適逢嗇色園95年周年紀慶，嗇色園將於9月首辦「黃大仙師上契結緣儀式」。

至於契老樹甚至石碑，靠近油麻地廟街的榕樹頭內的觀音樓社壇司祝蘇三錦就指，「依家醫學昌明，小朋友無咁易病，但以前唔同，好多父母驚仔女養唔大，就會上契，希望小朋友健健康康。」而榕樹頭內老榕樹及觀音樓內的石碑，就有相當多「契仔」、「契女」。

現時榕樹頭內不少榕樹都有逾百年歷史，蘇三錦稱，跟這些老樹上契寓意就是長命百歲，至於觀音樓內的石碑，其實亦是神仙之一。「姜太公封神，封漏自己，就封自己為石敢當。」因此石碑猶如神仙化身。蘇三錦謂，今時今日這個習俗仍未絕迹，仍然有人與老樹或石碑上契。「50、60年代應該係高峰期，當時經常有人嚟上契，依家就少好多啦。」雖然上契種類繁多，不過蘇三錦表示，無論與神仙、老樹或者石碑上契，儀式都大同小異，最好預備新衫、筷子、湯匙及米，寓意豐衣足食。