政Whats噏：朱凱廸查橫洲　泛民欲騎劫失敗

元朗橫洲發展風波愈演愈烈，本土派候任立法會議員朱凱廸一直咬住政府唔放，除了要求當局披露更多橫洲發展文件外，更揚言引用《立法會(權力及特權)條例》(特權法)調查橫洲事件。傳統泛民眼見橫洲呢張好牌，就喺尋日(28日)首次召開嘅非建制合作平台會議上討論，主持會議嘅民主黨涂謹申更在會後宣稱，朱凱廸已準備在下月立法會復會後提出引用特權法徹查。不過，朱凱廸隨即發聲明，否認復會後立即提出引用特權法，又強調未決定加入平台，同平台劃清界線，意味平台騎劫朱凱廸失敗。

新一屆立法會，非建制派陣營碎片化，取得22席嘅泛民諗住邀請手握7票嘅本土派，以及淺黃立場的醫學界陳沛然出席尋日嘅合作平台會議，商討日後如何在議事堂合作，但部分年輕議員唔多賣帳，青年新政梁頌恆和游蕙禎，以及熱血公民鄭松泰拒絕出席。主持會議嘅涂謹申會後努力營造泛民與本土派攜手合作嘅氣氛，除咗透露各人正為平台起名之外，又指朱凱廸已準備在下月復會後提出引用特權法徹查橫洲事件，而公民黨郭家麒會配合讓路，撤回原先嘅相關動議。

不過，朱凱廸似乎唔想被歸類為平台一分子，今日(29日)朝早發聲明澄清戳破合作假象，強調未決定加入平台，重申現階段仍主張要求政府立即公開一系列研究報告，不一定在復會後立即提出特權法。佢仲講明就算日後提出特權法調查，都唔係以平台代表身份提出，明顯係要同平台劃清界線！講白啲即係橫洲呢塊田一向都係佢耕開，平台咪旨意踩隻腳落嚟不勞而獲！估唔到議會未開始，泛民和本土派已矛盾盡現，睇怕日後在議事堂上都幾難合作。

另一邊廂，建制派協調就順利得多，據悉民建聯、工聯會、經民聯、自由黨、新民黨及五人組共6個政團代表今日開會，順利選出兩位「班長」，由廖長江和陳克勤分別擔任正、副召集人。會上亦初步支持梁君彥擔任立法會主席，李慧琼任內會主席，陳健波再任財務委員會主席，仍然有爭議嘅係張宇人同何俊賢都想做食物安全及環境衞生事務委員會主席。至於內會副主席及財會副主席，以及部分委員會主席，初步傾向可讓路予泛民，以釋出善意。

※更多政經猛料、秘聞，請關注政Whats噏fb：

https://goo.gl/ndFQNz