香港土地問題真係全城關注，本土自決派代表、青年新政立法會議員游蕙禎(游BB)昨天(3日)晚上「爆seed」指港人「扑嘢」(做愛)都找不到房間嘅言論，於網上世界熱爆，佢今日2度就「扑嘢論」進一步解畫，首先於facebook再有驚人言論，直指「年輕人就連扑野(嘢)的場所都買少見少，連扑野(嘢)都要排隊」；同日下午，游BB的言論略為收斂，表明無悔發表「扑嘢論」反映土地問題，對此毋須忌諱，她又表明會視乎情況，不排除有需要時於立法會內有類似表述。

理大學生會昨晚喺校園舉行論壇，討論收回單程證審批權等問題，獲邀講者全部是泛民及本土派議員，結論當然是一致支持收回審批權，及至論壇尾聲，游BB突然「爆seed」，話港人一畢業就要向政府還錢，又供不起樓，最慘是「就算我哋要扑嘢，我哋都搵唔到房去扑，呢個係一個好現實嘅問題！」

游BB這番言論於網上瘋傳，佢事隔數小時後於fb以「理工大學論壇後記」為題撰文，繼續就「扑野論」加上註腳，她狠批政府利用完年輕人嘅勞動力後，將之棄如敝屣，直言於市場飽和，各行各業難覓容身之所，及負債情況下，「年輕人就連扑野(嘢)的場所都買少見少，連扑野(嘢)都要排隊」，她重申爭取的並不是一個扑嘢空間，而是未來的出路，並稱要正視主權問題，重新選擇一個真正為自己開天闢地的民主政府。

而於今日較後時間，本身於中文系畢業嘅游BB再解釋「扑嘢論」由來，直言自己只是引述其他人說法，並非個人經驗，但強調無悔以「扑嘢論」反映土地、房屋問題，事關以上問題真實存在，毋須忌諱。當問及日後於議會發言時會否再爆seed有類似比喻，游BB未有說不，表明有需要時不排除會咁做。

話時話，游BB今次事先張揚於議會內或有爆seed言論，網民對此反應兩極化，支持者覺得佢好敢言，反對者就覺得佢身為議員，應要謹言慎行，下周三新當選嘅立法會主席似乎無可避免遲早要處理類似情況，甚或被建制派議員要求裁決有否違反《議事規則》，唔知由立法會秘書長陳維安領導嘅秘書處，會否做定資料搜集予新任主席參考呢？

除此以外，游BB尋日自爆於一、兩周前，於某日收到2名網友向其fb專頁發出不雅照片，當中涉及男生性器官特寫，幸好佢助手好快已經張相片刪走，否則真係嚇死游BB了。

※更多政經猛料、秘聞，請關注政Whats噏fb：

https://goo.gl/ndFQNz