搜查線：扎根工廈50年　安樂士多再不安樂

「咁多架生，賣又無人要，咪變爛鐵俾人收囉。」82歲的英伯，在土瓜灣一工廈樓梯底做了50年生意，以為可以做到退休安享晚年，豈料上月22日，卻獲大廈法團通知其檔口因違反建築物條例，需於3星期內遷拆。英伯除了不捨，亦不禁嘆息，「我只係想佢俾多1個月時間我，等我可以慢慢執，體恤下我老人家啦。」

英伯自19歲開始學師做水電工程，「嗰時無學歷，想學啲有用嘅嘢，係興趣嚟架」，之後約50年前，他於土瓜灣安樂工廠大廈一個只得數十呎的樓梯底開舖至今。「本來係做附近工廠嘅生意，但好多廠都搬咗上大陸，無生意咪賣埋汽水。」少了工廠這些大客戶外，不少商舖的客人亦嫌英伯年紀大，質疑他的工作能力而不找他做工程，英伯只能在舖頭修理電掣及水管等小手藝。至於賣汽水，英伯亦言「無辦法，都要搵下食，賺到嘅錢可以買到一兩餐餸。」

以為可以做到退休，英伯上月22日卻收到安樂工廠大廈業主的通知，指屋宇署以其店舖違反建築物條例，需要清拆，法團要將地方還原，要求英伯在本月15日前搬走，並需將地方回復原狀，令英伯措手不及，「我只係知僭建，都唔知邊處違例」。原來屋宇署今年1月已發出清拆令，大廈法團上月才正式發信通知英伯，現距離限期只餘約1星期，店內還有很多貨物仍未賣出，生活用品也未清空。

樓梯間就是英伯的小天地，他坦言將被清拆感到非常可惜。而一班街坊亦感到惋惜，街坊甘小姐指出，自社交媒體得悉英伯的士多即將消失，於是特意前來光顧，認為士多有獨有人情味。而幫襯了50年的老顧客萬先生亦指，「英伯喺到50年，依家先嚟搞佢，仲要佢3星期內搬走，好不近人情。」有修讀建築的學生特意到場，為這個特別的小空間以一幅幅畫作留下記憶。鍾先生說：「呢種風格嘅建築，應該過10年20年就已經無晒，所以我想記錄低呢件事。」而且，家庭式經營的士多已買少見少，「我都成日都同英伯傾計，都好唔捨得。」

「夕陽雖好，已近黃昏。」英伯望着舖內陪伴他50年的「搵食工具」，雖不打算東山再起，但仍慨嘆：「我哋唔係小販，唔可以話走就走，仲有好多貨尾，為求畀多少少時間我執起啲野。」東網記者曾向大廈法團致電查詢，但至截稿前未有人接聽電話。