八卦男女：開門利是9千9　新娘唔肯出門口

結婚當然唔少得接新娘的環節，而當中令一眾姊妹最為期待當然是「開門利是」！近日前港姐冠軍張名雅，金器嫁妝至少80萬，卻傳出開門利是只有3,800元，被「圍插」出手低，亦掀起了一片開門利是的熱烈討論。究竟一眾新人及姊妹認為新郎為接嬌妻要豪擲多少？

「我都係拎個意頭！」鄭先生數日前與新婚太太在紅棉路婚姻登記處舉行婚禮，他坦言一切從簡，故沒有在開門利是上花太多心思，只隨意封了500元給3名姊妹，取「百年好合」的意頭。

但另一位即將步入教堂的準新娘麥小姐卻擔心，接新娘當日姊妹與新郎會因開門利是而產生矛盾，事先張揚與各方面「夾定」，要求未婚夫「唔好包咁少」，盡可能5位姊妹每人可以分800元，「我都未諗好，但一定會預先同大家夾定，費時到時尷尬！」

開門利是讓準新人頭痛，對於一眾姊妹來說其實也是個考驗。「起碼總數都要有3,000蚊，話晒嗰日都好早起身幫手。」將要為好友當姊妹的程小姐指出，雖然不會要求新郎封巨額開門利是，但希望有數百元合理價錢，因為自己亦花了不少財力及心力協助準備婚禮。另一位準姊妹鄧小姐則稱，可以見證到好姊姊結婚已經好開心，笑言「佢畀幾多，我就嗌幾多，唔會搞串個場」，她又認為做姊妹「唔會吓吓講錢，情比金堅」。被邀作好友婚禮姊妹的朱小姐亦指友誼不應以金錢衡量，一切以姊妹的幸福為首。

「其實開門利是，無話死有一個公價嘅！」婚姻顧問歐惠芳表示，開門利是一般以「8」、「9」字作結，寓意大發特發、長長久久，「通常最低係畀999，跟住以1,000蚊咁加上去，聽過有啲新郎哥講返，話其實最唔想畀得大封，好多時都係新娘！佢哋想留返嚟做家用。」她又指開門利是只是約定俗成的結婚環節，旨在「大家開心吓，有啲開心聲、歡笑聲沖喜吓」，開門利是無論3,800定10萬，都係好姊妹啦！