政Whats噏：李國麟狂退委員會　成退會之王

今屆立法會一開始，由於民主派、本土派同建制派就18個事務委員會正、副主席嘅分配談判破裂，要「冧友」加入委員會爭奪正、副主席，搞到每個議員閒閒地都加入十幾個委員會。大戰過後，委員會隨即出現退會潮，民主派同建制派都有個別議員去信要求退出委員會，衞生服務界李國麟更一口氣退咗12個事務委員會，預計會成為今屆「退會王」，睇嚟委員會大逃亡仍會持續。

身兼衞生事務委員會主席嘅李國麟之前喺「冧友」嘅時候，一共加入咗18個委員會。佢今日(9日)連發12封信，分別要求退出工商、福利、保安、人力、財經、發展、公務員及資助機構員工、司法及法律事務、教育、資訊科技廣播事務、經濟發展及交通事務委員會，就連人事編制小組委員會同工務小組委員會都退埋。佢喺信中以調整工作安排為由申請退會，全部都獲得相關委員會主席接納，退出12個委員會嘅佢成為今屆嘅「退會王」。

除咗民主派之外，建制派議員都陸續退出唔同委員會。本身係財委會主席嘅保險界議員陳健波就「減磅」，退出民政、交通事務委員會；身兼政府帳目委員會主席嘅地產及建造界石禮謙亦退咗環境、食物安全及環境衞生事務委員會；議會「新丁」、工業界(二)吳永嘉就以公務甚為繁忙為由，退出咗交通、食物安全及環境衞生事務委員會，鄉議局嘅劉業強退出教育事務委員會；民建聯區議會(第一)嘅劉國勳退出資訊科技及廣播事務委員會，而田北辰及陳恒鑌就分別退出工商事務委員會。合計都有7個建制派同一時間「減磅」，相信退會潮將會繼續。

雖然話，出出入入委員會好似唔係太好，但有人話議員若要兼顧10幾個委員會根本分身不暇，同時令秘書處難以為議員夾時間開會，其實對各方面都無乜好處，成件事根本係一個僵局，不能化解。依家班議員陸續減磅，相信可以降番去一個正常水平喇！

※更多政經猛料、秘聞，請關注政Whats噏fb：

https://goo.gl/ndFQNz