堅勁！陳婉婷當選亞洲最佳女教練

恭喜晒！「牛丸」！繼打入健力士世界紀錄大全、獲頒銅紫荊星章，以及成為BBC年度百大女性後，東方龍獅女少帥「牛丸」陳婉婷再添殊榮，榮膺「亞洲足協年度最佳女教練」，認真犀飛利！

牛丸曾於天水圍飛馬做半職數據分析員，5年「轉會」3次，並經歷2次散班，呢位失業少女於舊年尾戲劇性成為東方主帥，及後經歷奇迹1年。出發前一直強調會抱「平常心」及希望「見識吓」嘅陳婉婷，在香港時間周四晚出席假阿聯酋阿布扎比舉行的亞洲足協年度頒獎典禮，依然盛裝出席。結果，去季帶領東方登上港超聯盟主寶座、成為史上首位帶領男子隊於職業賽封王女主帥的「牛丸」，力壓日本U17青年軍教練岡本三代（Miyo Okamoto）及北韓國家隊主帥李琴淑（Ri Un-suk），成為「亞洲足協年度最佳女教練」。

透過AFC官網直播目睹「愛將」奪魁，東方龍獅總監梁守志在電話訪問中興奮地表示：「好開心！當初知道有得候選已經好開心，畢竟係香港球圈嘅光榮、開心事嚟！依家大家都戥佢開心，『牛丸』好勤力，不斷學習，對自身要求好高，希望呢個獎可以轉化成佢奮鬥嘅動力，帶領球隊迎接未來挑戰。『牛丸』之前仲話想唔去，希望留低備戰星期六對傑志場大戰，好彩有去咋！哈！哈！」

女性在男人當道的足球世界向來是異數，「牛丸」陳婉婷能夠創造歷史，除了球隊老闆及幕後全力支持，更重要的是全憑真材實料，贏得一班球員尊重。東方龍獅隊長葉鴻輝便大讚「牛丸」夠「Open」!「由『牛丸』接任都依家，佢都好Open Mind，樂於接納唔同意見，呢個係佢成功之道。始終一個女仔要喺男子足球成功係相當難得，就算今年獲獎無數，佢都繼續好細心同盡力準備每一場比賽，能夠可以喺呢個國際頒獎禮獲獎，我哋全隊上下都好戥佢開心。」

據悉，「牛丸」在頒獎禮後將立即起程返港，希望趕及在周六（3日）的「榜首大戰」，以「亞洲足協年度最佳女教練」的身份督師。