政Whats噏：游蕙禎回顧片　拒提宣誓辱華

青年新政游蕙禎近日喺社交網站facebook(fb)好活躍，日前又上載短片到fb回顧2016年，佢喺片段中翻舊帳，狂數政府過去一年治港不善，批評政府損害香港既有嘅秩序和規矩，搞到香港個個都人人自危，但對自己喺舊年10月中因宣誓辱華而引發嘅軒然大波、之後又衝擊立法會整傷6個保安、佢同梁頌恆被法庭取消立法會議員資格，以及拖欠立法會嘅營運開支唔回水等事件全部隻字不提，究竟佢係失憶定忘我呢？

繼早前首次喺fb玩Live講歷史，之後又大跳日本爆紅嘅戀舞，踏入新嘅一年，佢又上載咗一段長約4分鐘嘅「2016回顧」。短片所見，佢喺黑房入面多次分身面對鏡頭自白，但內容就無乜新意，句句都只係鬧爆政府，由舊年農曆年嘅旺角暴亂有警察向天連開2槍，到教育局局長吳克儉(吳得掂)將大學生自殺歸咎佢哋無做好「人生規劃」，以至近期未經諮詢就拍板興建嘅香港故宮文化博物館，喺片尾都不忘批評現屆政府帶頭破壞香港既有秩序同規則，玩弄法律、剝削同迫害人民，仲話佢哋係「黑社會」唔應該被稱為政府。但翻查資料，吳得掂當時講嘅係「生涯規劃」而唔係「人生規劃」，難怪畀網友鬧佢「脫離現實言詞誇大」啦！

愈聽愈覺得唔妥，舊年9月自游梁當選開始，立法會就立立亂，先係佢哋宣誓時以「支那」字眼辱華及疑似爆粗，之後又訪台同台獨分子一齊「播獨」、跟住又多次衝擊會議廳企圖強行宣誓，癱瘓立法會、最後搞到全國人大常委會要出手釋法，跟住2人被法庭裁定取消議員資格，仲有立法會嘅營運開支186萬港元過期唔還，呢啲全部都係因2人而起，但要回顧2016都對事件隻字不提，根本就無反省過自己到底錯喺邊！究竟佢係失憶、忘我抑或諗住唔提就唔存在，當冇發生過呀？

除咗部分支持者嘅美言外，惹嚟網民嘅批評就更多。唔少網民留言指佢大言不慚，有網民甚至批評佢「欺騙無知群眾去盲目誤信天馬行空」，又話佢只係不停重複為人所知嘅問題。亦有網民指佢鬼話連篇、危言聳聽、口水多過浪花，建議游蕙禎「同計一計差政府幾多錢，好快啲回水啦」。

※更多政經猛料、秘聞，請關注政Whats噏fb：

https://goo.gl/ndFQNz