你要知：呢樣嗰樣唔做得？玲玲拆解新年禁忌

農曆新年快到，氣氛漸趨濃厚。然而，中國人習俗多，稍一不慎觸犯新年禁忌，或會影響來年運程。要開開心心過新年，大家除了要大掃除、派壓歲錢外，亦要謹記所有新年禁忌。有人話新年唔可以洗頭，又唔可以倒垃圾，否則就會影響運程，究竟真唔真？堪輿學家麥玲玲指，其實過年前已經有不少禮俗要注意，大掃除都好有學問，踏入大年初一都有不少禁忌。大家又知道幾多？

尚有幾日就到年廿八，過年前要大掃除，清理雜物，大家都知，不過原來大掃除亦有技巧。麥玲玲指，「舊年過得順，就由門口掃入嚟聚住佢，舊年唔順就掃出去，好差嘅，就用啲碌柚黃皮葉水，由頭淋到落腳。」而搬動屋內物品方位，亦有助來年運程。

去到年三十晚，除了食團年飯外，有人會給壓歲錢予小朋友放於枕頭底，原來有辟邪避災的意思。以往，亦有守歲的習慣，即仔女一整晚不睡，保持燈火通明，為爸爸媽媽添壽。不過，今時今日此習俗只有少數人會做。

踏入新正頭，「講乜、食乜」都有不少注意事項。首先，當然要講好意頭的說話。有人或以為食粥寓意豐衣足食，但亦有傳大年初一是不宜食粥，因為食粥寓意會窮足一整年，究竟邊個真？麥玲玲則指，大年初一不宜食粥，否則出門容易遇到下雨天。此外，不可午睡，有指因為午睡代表懶散，會影響來年運程，麥玲玲則解釋，需要午睡即代表精神不足，最好整天保持精神奕奕。同時，勿打爛東西或破口罵人。

想喚醒家人，早點起身準備出門拜年，就切記不要叫對方全名。如果對方於床上，不可向對方拜年，否則寓意對方病足一年。此外，正月亦不適宜買鞋。最後，中國人相信，初一至初八都有不同的生日，順序為雞、狗、豬、羊、牛、馬、人及穀。在當日不可進食該類食物，例如初一為雞的生日，就不可以食雞。

至於不可洗頭的習俗，麥玲玲認為洗頭後，只要梳理齊整就可以。另外，垃圾為財，初五才可倒垃圾的習俗，她笑指，「你敢唔敢呀，成屋都臭晒。」她認為，要為新年做好準備，拜神不要遲到、食開年飯、柴米油鹽不缺等更加重要。