探射燈：睇淡經濟焗慳　婚宴改擺午間

經濟不明朗，愈來愈多新人選擇舉行午間婚宴。今年為宜嫁娶的「雙春兼閏月」，惟晚間婚宴價格不菲，同樣菜式的午間婚宴，可以節省約2成開支，成為不少新人的「寵兒」。有婚宴業界表示，午間婚宴數目，近年每年有2成增長。東網記者於街頭向30對準新人做問卷調查，當中逾半考慮舉行午間婚宴，寧願留多些金錢去度蜜月。有經濟學者認為午間婚宴盛行，是一個警號，反映在本港經濟不明朗下，市民的婚宴可慳則慳。

將於明年3月與女友「拉埋天窗」的Wince表示，兩人已儲蓄近20萬港元做結婚「籌備基金」，「最初想晚間擺酒，花費約十幾萬元，如果改喺中午擺酒，同樣菜式，會慳一至兩成，『基金』仲有幾萬蚊剩，用嚟度蜜月。」

午間婚宴日盛，東網記者日前在街頭隨機訪問30對準新人，了解他們結婚擺酒的預算開支，8成受訪者預算花費10萬至20萬港元，逾5成受訪者指婚宴擺酒是最高消費項目，佔預算5至8成，當中一半受訪者表示，因晚間酒席費用昂貴，可能會選擇舉行午間婚宴。

「午間婚宴數目愈來愈多，估計喺過去3年，舉行午間婚宴嘅新人，每年都有2成增長。」婚禮顧問歐惠芳表示，「午間擺酒同晚間擺酒，最大分別係佔用場地時間多寡。晚間擺酒要大約6個鐘頭，午間擺酒只需要大約4個鐘頭，同樣嘅菜式及圍數，價錢可相差近2成。」

「午間酒席時間比晚間短，酒樓亦唔需要請咁多替工，人工成本低咗，價格自然可以平啲。」現代管理(飲食)專業協會會長胡珠補充，酒樓業界近3年有關婚宴酒席，近3成在午間舉行。除婚禮顧問服務及酒樓業界外，婚禮攝影師Raymond Chow指出，近年午間婚宴拍攝工作，上升近1成，「晚間婚宴收費大約一萬蚊，午間婚宴因為時間短啲，只做半日，收7至8千左右。」婚禮化妝師JoJo So亦表示，近年午間婚宴的新娘化妝工作，增加約3成，「晚間擺酒嘅新娘，至少要換3、4個妝，收費大約一萬蚊，而午間擺酒嘅新娘，只需要換一、兩個妝，所以收費可以減到7千左右。」

浸會大學經濟系副教授巫伯雄認為，午間婚宴盛行，反映香港經濟持續不明朗，市民連婚宴都要「慳皮」，如果這種心態持續，恐影響他們的生育計劃，會對社會長遠發展構成負面影響。

--------------------------------

想聽歌？想睇MTV？想了解本地Indie Band資訊，快啲click入「聲大夾樂」專頁：http://on.cc/musicon