搜查線：飲茶講禮儀　斟茶手指敲枱睇輩份

「咁早起身，去飲茶啦！」一家人到酒樓「飲早茶」，是港人生活不可缺少的部分。飲茶最初是由廣州傳到香港，到80、90年代再傳到台灣等地，現時港式飲茶已在亞洲各地非常盛行，但中、港、台、日、韓飲食文化大不同，一些港人眼中平常不過的習慣、禁忌和禮儀，外地人可能完全不明所以。東網記者找來從事飲食文學及文化研究的嶺南大學中文系講師蕭欣浩，為大家一一講解。

在茶樓「攞位」坐下後，一般港人都會先斟熱茶或熱水，將枱上餐具燙洗一遍，此做法可能是香港獨有？「喺香港，『洗嘢』呢個習慣無論喺飲茶時，定係有時去茶餐廳都會畀杯水你，係比較常見，其他地方並無呢個習慣！」蕭博士認為，因為早期港式飲茶為了講求效率，碗筷清洗得不夠乾淨，食客才會利用茶水清洗餐具上殘留的油漬。

雖然現時食肆衞生已大有改善，但習慣仍延續至今，而大部分酒樓都會在每枱提供一個水兜。蕭博士表示，正確的清洗方法，應是將茶斟在自己的小碗內，再放茶杯、匙羹及筷子入碗內沖洗。蕭指，有人認為水兜裝滿茶後，也可在內清洗碗筷，不過他就不會這樣做，「梗係啦！啲人洗完嘢，將啲污糟水倒入個兜到，用完之後個兜未必會洗乾淨！」

洗杯之後，別人斟茶時要表示「唔該」，有時會用手指敲枱示意。蕭指，相傳此習俗源於古時皇帝微服出巡，飲茶期間斟茶予臣子，臣子卻不可下跪，只好「以指代膝」。不過不說不知，原來平日用幾隻手指敲枱，也要因應斟茶者的輩份而定，「平輩斟畀你，就用2隻手指，長輩斟就用成個拳頭，後輩斟呢，就用1隻手指。」此外，斟茶予人時，斟得太滿亦被視為不禮貌。

點心或餸菜來到後，不可飛象過河之餘，亦不可將筷子插在食物上面，因與「上香」相似。蕭博士又指，如遇別人好意夾餸，應以手捧碗接過食物，不應伸出筷子與對方相接，此禁忌在日本、台灣尤其重視，「因為同啲喪葬儀式好相似，火化時職員會用長筷子喺盆入面夾起火化唔到嘅骨，子嗣用筷子接過夾入骨灰盅，都係筷子接筷子！」

數杯茶落肚，茶壺沒水時揭開壺蓋，職員就會加水，原來亦有典故，「以前有人帶雀飲茶，將雀放喺茶壺入面，伙記唔知，揭開就加水，好易就會淥死雀！」據稱，有茶客因此要求茶樓賠償。蕭指，因此大家都習慣揭開壺蓋，向樓面示意。此外，如桌上有魚，吃至一半亦忌「反面」，「水上人家認為魚好似船一樣，反咗就似翻船，唔吉利！」不過時至今日，水上人家已慢慢「上晒樓」，年輕一輩都較少注意此方面了。

--------------------------------

想聽歌？想睇MTV？想了解本地Indie Band資訊，快啲click入「聲大夾樂」專頁：http://on.cc/musicon