搜查線：靠難聽爆紅 大師吹牧童笛救港人
20170530
東網電視
更多新聞短片
開設「治癒系感情吹奏」專頁的4位大師，原來都是80至90後的男子。
童年時上音樂課，總有幾堂要學吹牧童笛。耳聽同學仔走晒音，自己又吹到流口水，相信是不少人的童年噩夢。不過，近日網上掀起一陣牧童笛熱潮，一個標榜是「治癒系感情吹奏」的專頁，月初開始不定時上載牧童笛短片，成名作品包括「六點半新聞報道」、「皆大歡喜」、「妙手仁心」等等，雖然走音不斷，但不少人仍然表示「唔知點解會聽晒」。4位「大師」濟世為懷，開Page只有一個目的，就是要將香港人的壞心情一一「超度」。
「玩咗咁多年（音樂）都係準，牧童笛揸唔準個音幾特別。」大師們現真身受訪，面具背後，是4名80至90後的男子，平日夾band彈開結他，近日卻迷上了牧童笛，貪其是童年回憶，「夠Pure夠True」。他們形容，開Page是受到「神的感召」，「某日聽到黃宗澤演唱嘅《最後祝福》，覺得啲音好啱用牧童笛吹奏，於是我去書局買咗支笛試吹，Send咗畀朋友，佢哋都好鼓勵我，就咁就開始咗。」
大師們笛功獨當一面，所用的笛也各有故事。其中大師1號「Flute Vader」（笛武士），顧名思義，與《星戰》有幾分關係，「呢支其實係壞咗嘅激光劍，喺呢個空間用唔到，所以我將佢改成笛。」2號「Flute Ninja」（笛忍者），所用的笛子於近日購入，另有一支中學時代的舊笛。3號「吹佛」則有3支牧童笛，有普通及特別版，但最常用的，卻是購自內地的廉價貨，「鍾意呢支因為佢好特別，用啱嘅手勢吹，就會好唔啱音。」至於4號「吹仙」，就較低調，多年來只以一笛走天涯。
談及吹笛要訣，吹佛分享心得：「音樂要有感情，吹笛時唔係自己控制手指，係由感情控制，手指唔可以駕馭感情。」 要「洗滌」網民心靈，他們全靠「指尖上的感情」，以及各人對笛的「悟性」。4人再三強調，平日錄歌不需練習，即興演奏，製作每條片只需約1小時。而因大師各有正職，歌曲都是各自在家錄製，再在網上整合。
東網記者有幸聽到4人即場吹奏「尋找他鄉的故事」，以及「佢家下黃色衫」，歌中的饒舌歌詞，4人都照吹無誤，當中亦有不少「感情位」（或稱走音位）。他們千挑萬選，發掘廣東歌曲中的滄海遺珠，只希望能引起共鳴，帶來歡樂。至於未來目標是甚麼？出碟或者尚未有期，但他們就呼籲各位「施主」，假如對新作品有所期待，今後可以多加互動，提出想聽歌曲。
-----------------
《魔法軍團Z》創新自由組裝機械人大戰！
日系機甲戰棋手機遊戲《魔法軍團Z》好評配信中！