我有正能量：拳出新生
泰拳予人拳拳到肉、腿法狠勁的感覺，有社企破格教授一班弱勢社群打泰拳，成功令近100位曾經迷失的邊緣青年及精神康復者，突破心理枷鎖，重拾健康體魄之餘，更找到人生的方向，學員間亦能發揮助人自助的精神。
「初初教班時真係有啲擔心，始終對精神康復者嘅印象比較負面。」身形魁悟的教練Eden，談起未教班前對精神康復者的印象，惹得眾人發笑。雖然心中有所憂慮，但他憑着「幫助更多有需要人士」的信念執教鞭，及後更與學員們打成一片。沒有板起一副教官嚴肅的臉，Eden反而多了一份細心，「唔好戴有色眼鏡，見到佢哋手震就做啲輕鬆嘅，由淺入深，令佢哋更加有成功感。」
泰拳搏擊對體能的要求高，但只要適度調整，8至80歲學員也能享受箇中樂趣：由熱身開始，到簡單的踢腿和接拳動作、自由搏打，最後放鬆肌肉。香港善導會龍澄坊高級經理Cressida說，眼前與常人無異的康復人士，原來曾患上嚴重情緒病如思覺失調、重型憂鬱症，「佢哋學泰拳短短半年時間，效果已經非常好，自信心強咗；好多學員話自己『食得瞓得，精神、平衡力都好咗』。」
除精神康復者外，學員還包括被主流社會標籤為壞份子的「邊青」，部分學員在學有所成後，更擔當起助教，以過來人身份分享經驗，「我同佢哋講，你叻唔係通街打『爛仔交』，而係打上擂台，學到拳擊技術後出去搵食。」與Eden一同創辦社企「精英社」的Anne說，他們的宗旨「走入邊緣，帶出精英」，正是希望透過泰拳平台，讓不擅讀書但有運動細胞的年輕人也能發揮才華，成就一番事業。
「學員學咗泰拳之後積極咗、生活檢點咗，會撇除唔好嘅壞習慣，fit咗！」Anne雀躍地點出一位位年輕人由迷失到找回方向的正面轉變，叫她印象最深刻的，是一名青年由最初對身邊任何事物都提不起勁，直至遇上泰拳，「居然搵到一樣佢好鍾意嘅運動」，身體由本來僅30公斤回復到正常水平，更於多個拳賽中奪獎，人生觀和與家人的關係均有好轉，現時更成為拳館助教。
耳順之年後，身體不復當年勇，許多長者因而獃在家中，殊不知缺乏鍛煉的身軀變得更易脆弱，慢慢萎縮下去。Anne以自己一對80多歲的雙親為例，「佢哋見我6個月減咗20幾磅，於是開始學拳，媽媽愈打愈起勁，醒目咗無咩頭暈；有糖尿病嘅爸爸體能亦變好咗。」她又計劃，未來為自閉症患者、低收入家庭開設公益拳班，並讓這些家庭的父母揸手靶，享受親子天倫樂。
-----------------
《魔法軍團Z》港日協力完美重現二十年機戰經典！
Gameone自主研發鋼鐵機甲主題回合制戰棋(SLG)手遊《魔法軍團Z》好評配信中！