政Whats噏:內訌浮面 鄭松泰叫游梁去死

20170611
東網電視
更多新聞短片
鄭松泰被爆叫游蕙禎和梁頌恆二人去死。
本土思潮近年喺香港冒起,但自立法會選舉過後,佢哋鬧分裂嘅情況日趨嚴重,甚至近日有網民流出一段錄音,聲稱係熱血公民立法會議員鄭松泰喺該組織內部工作會議時,爆粗大鬧青年新政游蕙禎同梁頌恆,「依啲X你,佢哋應該死啦!」仲話自己要同佢哋「扮Friend」,係要畀其他人知道熱血公民係幫緊佢哋,更大鬧「因為大眾白痴呀嘛」,所以會以為佢都係本土派。錄音流出後,唔少網民都話對佢好失望,有啲仲話投錯票咗畀佢添!
喺立法會選舉期間,熱血公民、普羅政治學苑同埋香港復興會組成「熱普城」聯盟參選。不過,呢排聯盟開始出現分裂,雙方支持者不斷喺唔同嘅網絡平台罵戰,甚至有前熱血公民嘅成員喺網上爆料,批評熱血公民內部嘅運作。
上年十月新一屆立法會開鑼就爆發咗宣誓風波事件,喺梁頌恆同游蕙禎多次因未宣誓而被拒絕進入立法會會議廳時,鄭松泰曾經一度拎住議事規則,去到主席台前抗議,最後被立法會主席梁君彥認為行為不檢,而被要求離開。
正當大家以為所有非建制派都幫梁、游,繼民主黨(白鴿黨)曾一度話唔認同佢哋嘅言論後,原來鄭松泰都只係同佢哋「扮Friend」。根據前晚網民所流出錄音內容,鄭松泰就話自己要同二人「扮Friend」,要畀其他人知道熱血公民係幫緊二人。佢仲大鬧,話「因為大眾白痴呀嘛」,所以會以為佢都係本土派、以為熱血公民都係青年新政。
錄音流出後,鄭松泰亦喺自己Facebook發表兩段聲明,證實段錄音係佢喺熱血公民工作組內講嘅,仲話啲內容係同工作匯報、內部溝通有關。同時,佢覺得自己嘅言論係「沒有甚麼是不可對人言的」。另外,佢又批評有啲成員冇遵守黨規,同埋破壞內部溝通指引,對此感到深表遺憾。佢仲話未來會檢討同改善內部溝通問題。
其實自從宣誓風波過後,游、梁好少喺公眾場合露面,支持度亦大不如前。今次鄭松泰爆粗鬧佢哋嘅錄音流出,明顯係將本土派不和同內訌浮面,而喺呢次風波當中,邊個係人?邊個係鬼?
※更多政經猛料、秘聞,請關注政Whats噏fb: