紙皮婆婆稱撤控多得市民關注 明可領手推車

2017年06月19日 20:02
東網電視
更多新聞短片
朱婆婆晚上開腔,多謝市民關心。(徐家浩攝)

一蚊紙皮、一位婆婆、一場犯眾憎風波、1.4萬名市民聯署抗議,食物環境衞生署事隔一周多於今日(19日)傍晚終肯跪低,決定撤銷對紙皮婆婆檢控,一天光晒!得聞撤控喜訊後,紙皮婆婆親口向連日來關心她的市民道謝:「係你哋關注咗,(食環署)先有人情味,多謝你哋。」朱婆婆又透露,已收到通知最快明日可領回被沒收的手推車及30港元保釋金。

75歲的朱婆婆因在上周日(11日)將幾塊紙皮交給外傭後收取一蚊,被食環署拘捕及檢控,朱婆婆的遭遇上周四(15日)曝光後,民間公憤愈燒愈熱,斥食環署執法過嚴且不近人情。

食環署事隔8日,終在今日傍晚宣布經徵詢律政司意見後,包括考慮到涉事人背景,決定撤銷有關檢控。到晚上, 朱婆婆再到一直協助她的東區區議員黎志強的辦事處,帶上口罩的她形容傍晚收到食環署通知撤控一刻,仍然非常擔心:「唔知係咪又有麻煩嘢,聽到話撤控,我係咁講多謝晒。」

她憶述,被檢控之初「食唔落飯、瞓唔到覺」,想了兩三天認為不公平,故向區議員求助:「一蚊都搞我,好唔公平,出邊阻街又唔檢控。」不過她指不用食物及衞生局局長高永文親自致函道歉:「唔使、算啦,唔使要求咁多」。

一蚊雞醜事曝光後,不同組織先後向食環署抗議,要求撤控之餘,有政黨上周六(17日)發起網上聯署聲明,指檢控朱婆婆不合情也不合理,截至今日的兩日內已有超過1.4萬人聯署。千夫所指的食環署在朱婆婆原定周三(21日)上庭前兩日,決定撤銷有關檢控,又指對於無牌販賣活動會採取適當的執法行動,致力保持環境衞生。高永文則強調前線同事有責任執法,當局將會檢討日後如何在執法時做到情理兼備。