BB仔計最低消費　港媽不滿　麵店霸氣回應

20170828
  • 東網電視
    更多新聞短片
    食肆設立最低消費，再次引爆食客與店家爭拗。(設計圖片)
    食肆最低消費再釀爭拗！有港媽在Facebook群組發貼，指一家四口到荃灣一家麵店，點了三碗粉麵，豈料店員稱每位食客皆要消費，故須點四樣食物。港媽不滿其歲半小孩皆要計算入最低消費，遂憤而離去。
    「吓，BB都要叫一碗？都要計埋？有冇搞錯？」發貼的港媽直指該麵店：「咁搶錢法我地惟有走，呢間嘢我唔知好唔好食，但好搶錢。」貼文引起網民熱烈討論，有留言批評麵店過分，但亦有人撐麵店，問：「BB有冇佔座位先？如果非手抱，佔座位，四人四碗好正常」。
    《港呢啲》聯絡了該麵店，接線男否認自己是麵店老闆，「大家都有大家立場，呢啲冇乜所謂嘅，無謂發酵啦，我哋冇嘢回應㗎。」
    記者追問，接線男卻隨即有話說：「唔係一定要買一碗，即係好似搭小巴咁，每個位要畀錢，咁嘅意思...斷座位計。當然你手抱BB，梗係唔計啦，吓嘩！」似乎暗指當天的歲半小孩，佔用了麵店座位。
    他續說：「香港地係咁㗎啦，人工貴舖租貴，係咪先？旺角嗰啲茶餐廳呀，剩飲水都收你十蚊一位啦...我哋地方咁淺窄，好老實嘅，你一家大細嚟到，我梗係希望你個個都食吓嘢啦，吓嘩，齋坐我哋梗係唔做啦，就係咁簡單之嘛。」
    「我哋又冇話夾硬嚟，你唔鍾意可以唔食，吓嘩，我哋又唔係強迫一定要你食。你覺得唔啱嘅，你可以唔幫襯，其實我就冇乜所謂嘅呢啲嘢。」
    「吓嘩」之聲從電話聽筒傳來不斷，該聲稱不是店東的男子亦表示，麵店已在當眼處寫明設有最低消費，並以佔用座位數量計算，「一句講晒啦，依家網絡世界嗰啲嘢呢，九成都係假嘅，一成就係真嘅，不過我覺得香港人呢，太過得閒，將嗰啲嘢無限放大，我覺得好無謂呀。」
    該男子回應擲地有聲，聽完他的訪問，你又幫邊個呢？
    ---------------
    《港呢啲》：大事小事騎呢事，東網電視嚴謹選題，輕鬆製作！