你要知：小強湧住入屋　打風落雨最高危

夏天溫暖多昆蟲，原來雨天都會令各種昆蟲周圍走，特別是令不少人毛骨悚然的曱甴。有滅蟲專家表示，潮濕有雨、打風低氣壓的日子，曱甴感到不舒適便會集體走到高處，甚至闖入屋內。就算被曱甴入屋，亦切忌「一時衝動」拿起拖鞋拍打，事關一旦將曱甴打至「肚破腸流」，其體內的蟲分分鐘污染家居各處。

香港常見的曱甴品種為德國曱甴、澳洲及美國曱甴，香港蟲害控制從業員協會副會長梁廣源表示，德國、澳洲曱甴體型較小，出沒於廚房；美國種則稍為大型，由渠道爬入屋，主要於洗手間出沒。「好似潮濕有雨，打風咁，佢哋受驚就會走入嚟。屋企唔係無孔不入，要盡量防止佢哋入屋繁殖。」

「屋企其實有啲去水位係經常冇水到，曱甴最鍾意喺嗰度爬入屋。」梁廣源教路，要善用家中番梘，防止大型美國曱甴入屋，最好「半桶番梘水倒落去水位度」，因番梘水可以封閉曱甴身體的氣孔，破壞呼吸系統令其死亡。另外，食物氣味可以吸引曱甴，吸引力遠超過曱甴藥餌的氣味。家中食物氣味最大的地方，莫過於廚櫃、雪櫃以及微波爐，因此一定要保持清潔，不要留下食物殘渣，否則放置曱甴藥餌也無效。

梁廣源指出，「佢哋咩都食，屎都食，連同伴嘅屍體都唔會放過。」曱甴是雜食性，所以當有曱甴食藥餌中毒死亡，其他曱甴食了牠的屍體，就可將毒藥傳給同伴。如果想活捉曱甴，可以自製捕捉器，用飯、蛋糕等做餌，放在強力膠紙上，曱甴便插翼難飛。梁廣源提醒，曱甴是筒線蟲的宿主，若追打時打爛其身體，其體內的蟲就會污染家居，故此若不幸有「小強」入屋，切記不要隨手拿起報紙、拖鞋拍打，而應輕輕捉起放到廁所沖走。