香港單車節揭幕　有選手求唔好畀大會車接走

第三屆香港單車節今日(8日)清晨上演，50公里賽事準時5時半，在主辦單位旅遊發展局主席林建岳及香港單車總會義務司庫梁志華等主持下鳴槍起步。50公里項目今年有破紀錄2600人參賽，一如往年涵蓋「三橋三隧」。

不少參賽車手為霸佔前列位置，早於凌晨12時已抵達尖東海旁起等，搶先於3時第一時間上線，希望不受阻滯踩畢全程，並毫無障礙地欣賞沿途風景。選手們亦在現場熱身，並準備香蕉及能量棒等補充體力，希望發揮到最好，亦有人坦言：「只求完成賽事，唔好畀大會車接走！」

一行四人連續三年參賽的簡先生，凌晨12時已乘搭尾班車到尖東整裝待發，「單車節唔似馬拉松咁會提早開車，咪惟有早啲出發囉！」踩了25年單車的簡指，50公里的路線並無難度，而且沿途三橋三隧景色宜人，但礙於香港單車政策並不友善，有關路線平時亦禁止騎行，機會難得所以連續三年參加，「不過有時間限制，冇乜時間睇風景！」

新手林先生則於凌晨約1點由葵涌出發，沿貨櫃碼頭騎行到尖東，笑言半小時、十幾公里的路程猶如熱身，「過三個鐘之後先起步都凍晒啦，出發前要再熱吓身！」他稱與車友賽前已每周安排一次50公里的練習，今日亦準備了充足食水及能量棒補充體力：「仲有鹽水，抽筋時可以用！」目標兩小時內完成賽事：「唔好畀大會車接走就得啦！」