政Whats噏：廠商會改選峰火　楊立門話難搞

中華廠商聯合會(廠商會)年底改選新一屆會長，2名副會長吳宏斌同徐炳光早已表態有意角逐下屆會長。會長係由逾100名會董選出，而家正值會董選舉，令雙方陣營提早進入「作戰模式」，一方指部分選票失蹤，並報警處理，另一方則入稟高等法院控告有人誹謗。廠商會今日(16日)亦召開緊急會董會，逾40張早前被懷疑有問題嘅選票最後被凍結。上任無幾耐嘅廠商會行政總裁楊立門(Raymond)要處理呢啲拗撬，都話今次選舉係上任以來最難處理嘅事！

廠商會會長一戰近日風風火火，徐炳光聲稱接到來電，指部分選票失蹤，並報警處理。另一派陣營嘅副會長史立德則控告指徐誹謗，2名原告包括史立德及華彩印刷有限公司，被告係徐炳光。入稟狀指稱，徐於本月12日同13日，透過唔同嘅社交聊天平台同電郵，向廠商會嘅會員同非會員發放誹謗及惡意虛假嘅信息，令2名原告蒙受損失，2名原告因此向徐索償，以及要求法庭頒令禁止徐本人或透過其他人士發表或覆述相同或類似嘅言論。

呢場亂局仲包括早前被懷疑捲入50間公司會員選票申請更改相同郵寄地址，涉及簽名筆迹相近嘅風波。消息指，有資深會董對今次選舉令近日出現大量流言同傳聞深表關注，擔心損害廠商會聲譽，要求召開緊急會董會，原本會議喺上周五(13日)召開，但係Raymond唔喺香港，所以等埋佢今日先開，結果有逾半會董報名出席。

據知，會議開始前，秘書處已要求涉事選票嘅有關人士重簽，個別人士簽得返，但係有45張選票就一係簽唔返，一係當事人冇嚟簽，最終會董會通過凍結呢啲選票，由於有人要求查明事件，秘書處亦會繼續調查。

據悉今次會議原意係處理嗰批選票，但各會董都好多嘢講，令會議開咗成3個幾鐘，有人甚至提出今次選舉咁唔和諧，令廠商會名譽掃地，不如推倒重來，但係就遭到一面倒反對。

Raymond接受查詢時就話唔講開會董會關於乜嘢事，但廠商會選舉都係佢上任以來最難處理嘅事，因為都係一件大事，平日唔係選舉大家都相安無事，而家就唔係咁平靜，自己最近都好忙碌，因為有拗撬，選舉嘅時候都會比較多指摘，秘書處都難以置身事外，亦都怕順得哥情失嫂意，都唔容易解決㗎，而秘書處最緊要都係跟事實去做啦！

有廠商會中人分析，廠商會涉及太多利益，包括1個立法會議席、18個選委，以及以億港元計嘅資產同現金，所以會長選舉都係特別緊張同爭餐死囉！