逾百內地客塞爆香港仔　警察出動原來為...

內地旅客的身影，竟然出現於香港仔的田灣？有網民拍下逾百名內地客，在黑夜裏塞滿行人路及馬路的情景，附近的居民被迫繞道而行，甚至有警察到場維持秩序。有街坊及商戶均表示，類似情況已持續數年，不勝其擾。

貼文在社交群組「南區之友」一出，即時引來一班街坊關注。有街坊表示，該間位於田灣街的酒樓，不時接待內地旅行團，每逢午市、晚市的時候，人滿為患的情況尤為嚴重。一批批的旅客在酒樓門口排隊「等食」，龍尾延伸至5、6個舖位後，有時甚至佔據車道。

田灣區議員陳富明接受《港呢啲》訪問時表示，旅客排隊擾民的情況，已持續約3年，一直有向該酒樓跟進，「酒樓冇要求旅行團做登記或訂枱，導致咁嘅情況。我哋要求過佢派人控制人流，但係酒樓冇做，可能唔夠人手。」

陳富明續指，除了人車爭路的情況外，旅遊巴的違泊情況同樣嚴重，不時造成交通擠塞，「我哋曾要求警方加強執法，亦向旅行社反映情況，要求佢哋提醒旅遊巴司機，遵守交通規則，並避免喺巴士站、小巴站等禁區上落客。」

他表示，早前已聯同運輸署在田灣街及石排灣道一帶，劃出更多禁區標誌，並掛起橫額，勸喻司機不要違例泊車。但他向記者嘆息道︰「見到咁多年都冇改善，非常氣餒。」

想睇情況有幾誇張？即刻睇片！

---------------

《港呢啲》：大事小事騎呢事，東網電視嚴謹選題，輕鬆製作！