政Whats噏:張炳良復出任公職 檢討專上教育

20171019
東網電視
更多新聞短片
張炳良復出,擔任「檢討自資專上教育專責小組」主席。(設計圖片)
政府今日(19日)宣布成立「檢討自資專上教育專責小組」,探討自資專上院校嘅角色定位同研究副學位嘅未來路向,仲搵咗運輸及房屋局前局長張炳良擔任主席。唔通係因為政府人才荒到咁,要重召舊將?但據悉,因為小組嘅檢討涉及副學位,政府睇中張炳良係呢方面冇利益衝突,咁就唔會惹起非議嘞!
教育係現屆政府主打政策之一,繼推出36億港元教育新資源撥款後,施政報告亦提及教育局會喺多個範疇成立專責小組,而政府今日宣布成立檢討自資專上教育專責小組,委任張炳良擔任主席,而成員當中還包括行政會議前成員、曾有「公職王」之稱嘅中信前高層范鴻齡。
呢個小組會研究自資專上院校嘅角色定位,亦會睇下副學位日後點發展,但眾所周知,自資專上院校背後涉及唔少利益,而副學位課程亦係專上院校嘅收入來源,意味相關嘅政策改動將牽動眾多既得利益,搵邊個做小組主席就要更加嚴謹,否則會惹起軒然大波。
其實教育界都有唔少人才,點解政府偏偏睇中張炳良呢?張炳本身來自教育界,喺佢加入熱廚房之前,係香港教育學院(教育大學前身)嘅校長,對專上教育有充分嘅認識,但呢個只係其中一個原因。
據悉,政府屬意搵一個退休人士嚟做檢討,尤其係因為小組會檢討副學位日後嘅發展,若果搵持份者做主席,會被人質疑有偏頗,而張炳良除已退休之外,再加上有傳教大未來嘅方向會取消副學位,希望做多啲碩士同博士,所以搵張炳良幫手做檢討,就唔會令人覺得有衝突。
雖然話政府事前諗過度過,終於篩剩張炳良係合適嘅人選,但係小組檢討嘅範疇好複雜,睇嚟張炳良呢個主席都唔易做呀!
此外,政府亦公布成立「檢討研究政策及資助專責小組」,由香港大學前校長兼港科院院長徐立之出任主席,小組會檢討高等教育界研究工作的支援策略,以及研究撥款的分配方法等。