政Whats噏：工黨換主席　老鬼陰魂不散

成立就快6年嘅工黨，先喺2014年被揭發時任立法會議員嘅李卓人收取壹傳媒黎智英(漢奸黎)部分捐款「袋住先」9個月，醜聞纏身，喺舊年立法會選舉仲輸埋個議席，早前又爆出內訌，前議員何秀蘭被指同前主席胡穗珊不和，搞到後者退黨抗議。工黨今晚(19日)舉行周年黨員大會，選出新一屆黨主席、常委同執委，但李卓人繼續做副主席，何秀蘭就換個身份，由個人轉做團體執委，呢啲「老鬼」簡直係陰魂不散。

工黨新一屆主席為大埔區前區議員郭永健、副主席(黨務)為譚亮英、副主席(外務)為李卓人、東區區議員麥德正任副主席(政策研究)、陳昭偉出任紀律委員會主席、秘書長為李文峰、副秘書長由曾國輝出任，司庫則為何偉航。至於喺今年8月底同胡穗珊嘈完辭咗執委同副秘書長職務嘅何秀蘭，就改為擔任團體執委。譚亮英仲話未來工作就係幫個黨吸新血，尤其係要吸啲年輕人咁話。換言之，班老鬼賴死唔走，又冇新血加入，睇嚟好快後繼冇人。

郭永健新上場就即刻話希望未來可以帶領工黨走出低谷，講到明依家得張超雄係立法會議員，個黨喺議會聲音非常薄弱，市民都唔係好識得佢哋。佢又話唔想畀工聯會獨大成為勞工階層嘅聲音，覺得可以參加明年立法會補選，所以民主派要團結一致去應戰，希望可以贏番個位，共同對抗建制派，佢仲爆工黨月底會開個特別會議，討論派乜嘢人去參加泛民搞嘅初選，唔排除只有佢去參加新東初選，但就強調乜都未傾掂。至於李卓人可能自知都衰硬，所以講明自己唔會參與補選。

泛民初選傾到埋尾，工黨先叉隻腳入去，簡直就係多隻香爐多隻鬼。郭永健解釋一直都無參加初選「持份者」協調會，只係參加咗民主動力嘅協調機制，仲話呢個諗頭唔係突然有，半年前已開始諗，但又唔見有初選機制，「如果班大佬死都要衝，咁講嚟都冇用喇」，而且如果工黨一開波就話選，畀人覺得泛民又亂同鎅票就唔好喇，咁依家有機制咪考慮吓囉，強調自己無刻意隱瞞呢個諗頭。