政Whats噏:財會防拉布 工務人事兩組免摺

20171120
東網電視
更多新聞短片
有議員認為如果冇咗工務小組同人事編制小組作關卡,可能令到建制派喺財會時都會插埋政府一份!(設計圖片)
立法會財務委員會以往為泛民議員拉布嘅主要戰場,雖然今個立法年度嘅財會進度較以往順暢,但建制派未有放棄出招,企圖減少泛民拉布機會,好似財會主席陳健波早已落實「主席指引」,而今日(20日)亦就修改會議程序舉行簡介會。不過,建制派早前密謀摺埋財會轄下嘅兩個小組,據悉就已經胎死腹中。
早前分別有建制派同泛民主派議員提出修改財會會議程序議案,而為咗決定修訂程序,今日就舉行閉門簡介會。陳健波話簡介會主要由秘書處講解諮詢文件,並就修訂會議程序方式作出解釋,又話會喺本周六(25日)召開特別會議,若當日能夠通過,最快下月16日可以討論修改會議程序。
修改會議程序望落有所進展,但陳健波估計屆時有唔少修訂,相信過程漫長。而佢喺上個立法年度曾講過,有需要探討重組工務小組同人事編制小組一事,據聞已經無咗呢回事喇!
根據立法會《議事規則》,財會轄下嘅工務小組同人事編制小組,用作協助審核政府提交嘅公共工程開支同埋更改公務員編制嘅建議,但2個小組都冇獨立權責,其建議無法約束財會。不過,財會所審議嘅項目都會先交由工務小組同人事編制小組討論,所以項目去到財會時已有普遍共識,從而節省時間。然而近年拉布成風,議員喺兩個小組上不斷提問,項目交到財會時又繼續問,令拉布更為嚴重,導致政府嘅撥款申請大塞車。
現時工務小組同人事編制小組嘅主席分別係盧偉國同葉劉淑儀。有建制派議員透露,雖然泛民經常將喺2個小組發動拉布,但摺埋計劃已經胎死腹中,因為兩個小組能為財會擋一擋,好似陳健波主持會議時,都會提及問題已經喺兩個小組問過,更數埋喺當時討論咗幾耐,令到剪布時更有說服力,可以顯示有足夠嘅討論,所以直言有保留嘅價值。
另外,該名議員亦批評政府官員答唔到問題,認為設立2個小組可以令到官員做定功課,避免去到財會時被問到口啞啞,若然冇咗兩個小組作為關卡,可能令到建制派喺財會時都會插埋政府一份添!再者,摺埋小組又會引發如何安排兩個小組主席嘅問題,為咗避免分贓唔勻都係維持現狀喇!
其實針對財會拉布問題,喺今個立法年度已作出唔少改動,好似主席指引已全面落實,將本身多節財會會議視作同一次會議、討論縮短表決鐘聲議案發言減至1分鐘等,而且建制派亦提交修改會議程序建議,即使唔摺埋兩個小組,相信都可以改善到財會拉布情況嘅。