食水異味：居民鬧爆水署「未查就話冇事」

荃葵青區食水有異味仍未解決，水務署繼續派出水車及水箱到三區供水。其中大窩口邨今早放有三個水箱給居民取水。輪水的李伯鬧爆謂：「水務署梗係話（食水）無問題，水質化驗報告都未確定乜嘢事，就話無嘢，大人飲咗仲好啲，小朋友就會有好大影響。」李續稱，近日用來飲用後，感到口乾，認為水務署現時最重要是補救水質。另外有女街坊表示，雖然不覺食水有異味，但發現水中有黑色雜質，故仍不敢飲用。

由於街坊仍擔心水質，今晨不少居民落樓取水，其中羅太育有一名7個月大的B女，她指因擔心小朋友的健康，故落樓取水。

居住葵涌邨碧葵樓的譚生指昨日水喉水好大陣味，今日情況好轉，但煮食時會使用樓下取回的水，洗碗則會以家中濾水器處理過的自來水。他坦言直至看到新聞，證實食水安全，才放心使用家中食水。

葵涌邨亦有水車供水，據附近食肆職員表示，由於裝有濾水器，故可以繼續使用自來水，毋須到水箱取水。有居民則稱，由於仍好擔心，故不敢取用自來水煮食，「唯有落樓到水車攞多幾轉水，慳住用。」附近超市則在當眼處放置樽裝水供居民選購。而大窩口邨及葵涌邨邨內的酒樓今晨似乎已未受事件影響，街坊如常飲早茶。

葵青區區議員黃潤達表示，葵青區共有16座樓，現時芷葵樓、夏葵樓及綠葵樓的水缸已經換了新水，其餘13座水缸會陸續換水，預計會在本周五完成。黃續指，雖然今日水的異味減少，但水務署應要追查氣味源頭及出事物質是否安全，及盡快向公眾公布消息。

水務署發言人表示，今日仍會在葵涌邨、大窩口邨及葵芳閣，提供水車及水箱。惟該署仍未交代食水異味來源及成分。