政Whats噏:市建想收購800舊樓?韋志成靠嚇

20171126
東網電視
更多新聞短片
市建局係咪真係想買晒呢800幢舊樓先?抑或韋志成靠嚇咋?(設計圖片)

市區重建局喺上個財政年度錄得31.4億港元盈餘,資產淨值更創新高,達326億港元,庫房水浸被市民批評「賺到盡」。市建局行政總監韋志成繼早前為庫房水浸解畫後,今日(26日)又喺網誌揚言若果要處理油旺區800多幢舊樓,可能會出現接近1380億港元財務虧損。市建局係咪真係想買晒呢800幢舊樓先?抑或韋志成靠嚇,想為庫房水浸洗底兼為「賺到盡」漂白呀?

市建局自2013/2014年度錄得23億港元赤字後,翌年突然錄得11億港元盈餘,之後庫房持續水浸。其實韋志成喺早前發表嘅網誌已解畫,話唔好見市建局有盈餘就話係「賺到盡」,又話預計未來數年將有300多億港元現金支出,用喺需求主導計劃、樓換樓安排、樓宇復修計劃等措施,條數啱啱好冚番晒資產淨值嗰300幾億港元,擺明係想話冇水浸呢回事。

唔知係咪見仲未說服到市民,韋志成今日又喺網誌話市建局喺今年5月展開咗一項為期2年嘅油旺地區研究,初步資料顯示,區內的樓宇中約有837幢已用盡其地積比率,甚至達「負數」,超出現行城市規劃同法例框架所准許嘅發展密度限制,並揚言單單處理呢800多幢舊樓,喺扣除收益後將可能面對接近1380億港元財務虧損。佢又話油旺區嘅研究涉及3350幢樓宇,強調如果唔拆卸重建,改為為呢啲樓宇進行復修,估計需要投放每平方呎約1000至2000港元,係現時一般公共地方復修每平方呎金額嘅10倍或以上。

佢又強調自佢上任以來,絲毫冇感到市建局以「賺到盡」作為制訂同執行政策嘅考量點,相反正因為唔係以「賺到盡」出發,喺過去多個月管理團隊先會推動多個唔同嘅大型研究。

係咪「賺到盡」唔係靠把口講嘅,睇番市建局過往將舊樓拆卸重建後,被外界批評係賣天價樓,更加被質疑市建局嘅方針趨向「向錢走」,如果唔係有前科,市民又點會覺得市建局係賺到盡吖!

再講,韋志成而家講到市建局未來唔單止可能蝕1000幾億港元,仲預告呢啲舊樓復修後價錢必定貴添!咁究竟市建局係咪真係會買晒呢800多幢舊樓先?否則講到咁大,無非都係想為「賺到盡」「洗底」,想「洗底」都唔使靠嚇㗎!