政Whats噏:驚打天九失傳 侯志強諗搞大賽

20171127
東網電視
更多新聞短片
侯志強話打算搞打天九大賽。(溫國佳攝)
一向多搞作嘅上水鄉事委員會主席侯志強,最近又有新諗頭,佢話打算搞全港「打天九」大賽,強調唔係鼓吹賭博,而係推廣新界傳統文化嘅遊戲咋!
侯志強話自己約6歲就識打天九,但近年就愈嚟愈少人識打天九,所以打算喺農曆新年後,搞一個打天九大賽,因為過年就最多人玩,承接住個熱潮,初步構思嘅比賽方式,就係先由廿七鄉篩選代表隊伍,全港市民都可以參加,其後由27隊逐步篩選出12隊、4隊、2隊,最後一隊勝出,就可以成為「天九王」嘞!
講講下,佢仲開始教大家點樣打天九,講得相當起勁。佢仲話依家開始教6歲嘅孫仔打天九,先傳子,再傳女,其後才教孫女玩,大讚天九可以訓練到腦筋靈活啲喎,佢擔心過多幾年會失傳,所以依家要推廣多啲喎。