政Whats噏:建制派輸議席 葉國謙又孭鑊

2017年11月27日 22:47
東網電視
更多新聞短片
補選曲終人散,葉國謙孭鑊,許智峯心噏。(設計圖片)

中西區區議會東華及山頂選區補選曲終人散,其中民主黨(白鴿黨)成員伍凱欣重奪該黨失落多年嘅東華選區,力壓報稱無黨派嘅新會商會學校校長呂錦強而當選,最令人意外嘅係,呂嘅得票未能承接民建聯(民記)蕭嘉怡前年嘅1300多票,兩者相差400多票。有熟悉地區人士分析,建制派得票大跌輸議席嘅原因,最主要係建制派突然玩「切割」,昨日(26日)全日未見重量級人士為呂站台,當中盤踞中西區多時嘅民記立法會前議員葉國謙更被發現鬼祟駕車經過,都唔選擇落車傍住呂錦強,睇怕葉國謙等人都要為輸議席齊齊孭鑊。

東華選區嘅議席空缺緣於蕭嘉怡辭職加入政府任政務司司長政治助理,白鴿黨過去10年均有派人喺東華選區參選,當中有贏有輸,今次派出第三度轉區參與區選嘅伍凱欣;至於蕭嘉怡所屬嘅民記今次決定不派人出陣,避免被選民以選票懲罰蕭嘅接班人,最終由呂錦強披甲上陣,值得留意嘅係,呂喺競選期間多次獲建制派重量級人士站台支持,包括食物及衞生局前局長高永文等人,因此呂被視為與建制派友好。

有政界中人選前評估東華選區,建制、民主派勝出機會是五五波,最終結果勝負只在100多票之間,當中伍凱欣保住民主派基本盤,取得1034票,相反呂只得909票,與蕭嘉怡前年得票相差400多票。有政圈陰謀論指,低投票率嘅傳統智慧,應對屬於建制派政治板塊嘅候選人有利,然而,今次呂錦強完全無受惠於不足40%嘅投票率,未能「悶聲發大財」,有傳這與民記放軟手腳,未有把鐵票全數過戶予呂錦強有關,有人更估計隨着呂落敗,民記將大條道理喺兩年後嘅區選,派出自己人去收復東華選區嘅失地。

另有政界中人分析,呂錦強一反喺選前獲建制派重量級人士群星拱照,選舉當日只有自己同助選團拉票,最終不單與建制派「切割」不成,更因缺乏叫座力,未能吸取游離票支持,最後選情亦回天乏術,只可以與議席擦身而過。

同樣值得留意嘅係,雖然白鴿黨今次成功重奪東華選區,但外號「峯鴿」嘅立法會議員許智峯或斯人獨憔悴,事關佢當初屬意嘅參選人無緣出線參選,依家畀由南區「乳鴿」支持嘅伍凱欣出選並成功當選,峯鴿面對南區「乳鴿」步步進逼同擴大勢力,預料未來會有更多明爭暗鬥。

此外,同日另一場補選,教育局前政治助理、自由黨楊哲安以近1000票之差大比數擊敗對手當選,力保自由黨喺山頂選區呢個橋頭堡。因應楊哲安首度當選區議員,加上有多年喺官場打滾嘅經驗,據聞有人密謀力推佢更上一層樓,喺兩年後再度連任區議員後,於2020年立法會換屆選舉衝擊俗稱「超級區議會」嘅區議會第二功能界別議席,究竟呢個盤算係咪打得響,時間將會證明一切。