內地客截的士去「維港」　的哥：你跳落去啦！

維多利亞港喺邊大家都知，但如果你化身司機，有乘客叫你車載佢去「維港」，你又會有咩反應？

近日有的士司機於社交群組「的士司機資訊網Taxi」發貼，指有兩名內地旅客要求前往維多利亞港，司機即場大感?頭，笑言「唔通跳海」？豈料貼文一出，卻負評如潮！

該司機指，凌晨12時許於中環畢打街，接載了兩名內地女遊客，表示要前往維多利亞港。他即時回應︰「維多利亞港喺海中間，點去？」其後兩人解釋是「灣仔嗰個」。

該司機表示自己?晒頭，最終經過一輪爭拗後，將二人送到金紫荊廣場，更謂︰「前面就係維多利亞港，你哋畀完錢後，要跳入去就自便。」他最後怒斥︰「都唔X知乜X旅遊書，教大陸人去維多利亞港，痴X線！」

貼文惹起網民討論，有人指責司機影響香港形象，「遊客搞唔清楚唔使咁呀」、「香港旅遊業被你搞死」。另外，又有不少人「食花生」，你一言我一語競猜旅客想去邊︰「人哋係想去維多利亞…酒店」、「係咪維多利亞公園」、「維多利亞港等於星光大道」、「應該車去天星碼頭叫佢等船」。

唔知大家心目中的維多利亞港，又喺邊度呢？

---------------

《港呢啲》：大事小事騎呢事，東網電視嚴謹選題，輕鬆製作！