政Whats噏：葉劉爆被《蘋果》作家恐嚇　領展震驚

領展近年接連出售旗下商場及停車場，遭到唔少議員批評，有團體更形容領展此舉係「劫貧濟富」，過去曾多次於專欄、立法會批評領展嘅新民黨立法會議員葉劉淑儀今日(6日)報稱，領展曾透過身兼《蘋果日報》專欄作家嘅公共政策顧問李兆富恐嚇佢，並要求「收手」，否則會「郁佢啲區議員」；被點名嘅李兆富全盤否認指控，包括冇講過「郁佢啲區議員」等言論，但承認曾受聘於領展負責政策研究；領展對於葉太嘅指控表示震驚，重申領展絕對唔會透過任何人士向新民黨表達葉太所指嘅言論。

立法會今日大會6條議員口頭質詢，首條就係與領展出售17個商場物業嘅消息有關，未能輪到發言嘅葉太於會議廳外嘅咪兜位，公開報稱「領展派人恐嚇我」。葉太憶述幾個星期前，「領展派出一位專欄作家叫李兆富」，喺一個討論Uber嘅場合，對該黨嘅政策總裁袁彌昌講，「叫葉劉好收手啦喎，再唔收手呢，就會郁佢啲區議員」。

葉太續爆料，自己之後有同人呻過此事，領展就派班公關嚟搵佢，話請食飯傾吓，葉太爆Seed話，「以為請你食兩餐，飲靚酒就擺平我咩？簡直荒謬！」

葉太又稱，領展行政總裁王國龍曾透過第三者，稱公關人員唔識嘢向其道歉，她又提及王國龍試過搵其校友兼立法會議員劉業強做中間人，約她食飯擺「和頭酒」，葉太即刻斷言拒絕。

葉太重申自己唔驚領展，會繼續跟進問題，但唔會報警，以免麻煩警察，佢只係擔心該黨數位正租領展商場舖位嘅區議員，或會被加租甚至迫遷。警方於晚上表示，正主動了解事件。

李兆富回應時全盤否認指控，稱當日同袁彌昌係以朋友身份傾偈，「唔知佢(袁彌昌)點同阿太(葉太)講」。李堅稱，當日只係同袁彌昌提及，新民黨對領展有意見，自己可以做中間人幫手大家傾吓。不過，李承認領展曾提及葉太嘅專欄，又坦承幫過領展寫風險報告同做政策研究，但依家已經無任何合約關係。

領展發出新聞稿回應葉太嘅言論，對於葉太嘅指控感到震驚，強調領展絕對唔會透過任何人士向新民黨表達葉太所指嘅言論。

領展又稱，一直有同新民黨保持溝通，鑑於葉太近月喺媒體就領展事務嘅評論，「反映其對本公司的情況了解並不全面」，因此希望透過唔同途徑加強有關溝通工作。究竟葉太同領展嘅隔空過招會否延續，時間將可以證明一切。