3年無拖拍毒男　油塘劫夜歸女胸圍底褲

任職推銷員的姓曾（38歲）女子，今日(12日)凌晨2時許，身穿短裙長靴，乘巴士返抵油塘中心巴士總站後，獨自步返寓所，她沿鯉魚門道往油麗邨方向，步經油美苑澤美閣近停車場入口位置，一名身材矮細男子迎面而來，旋即轉身尾隨她，先從後箍頸掩口，扯她頭髮撼埋牆，再推她落地，然後揮拳連番擊向她頭部。

曾女憶述事件時猶有餘悸，指男子邊打邊恐嚇說：「攞晒啲錢出嚟，唔係殺死你！」曾女表示無帶銀包，男子即再揮拳狂毆，曾女稱：「你打死我都冇用，我真係無帶銀包出街」，對方喝問：「你同乜嘢人住？」曾女被嚇至花容失色，表示：「我同屋企人住。」並且下意識抱頭閃避對方再施襲。賊人其後喝令她脫下底褲及胸圍，曾女反問對方：「喺街度點除？係咪我除咗，你就走？」賊人答：「係，總之同我抆出嚟，如果唔係我幫你除！」

曾女無奈就範，伸手入衫內除下胸圍及打底褲交予賊人，惟賊人得寸進尺，色迷迷向曾女稱：「我3年無拍過拖，無女朋友，可唔可以做我女朋友？」又表示：「對唔住呀，我唔係想傷害你。」曾女見對方已停止施襲，膽粗粗仰頭望向賊人時，對方即喝令：「擰歪面，唔准再望。」又圖搶曾女的手機，要求曾女說出手機號碼。

曾女捉緊手機拒絕交出，期間賊人欲向她「上下其手」，曾女不停掙扎反抗，曾女指賊人「當時好鎮定，唔似飲醉酒，又唔似真係要錢」，所以懷疑對方精神有問題，並說：「如果唔係都唔會叫我做佢女朋友，仲想錫我」，幸好一名休班警員跑步途經，賊人即時離去。曾女向休班警求助，表示遭搶去「胸圍底褲」，對方起初不相信，但看到她頭部傷勢後立即協助她報警。

曾女頭部流血受傷，送聯合醫院治理，後腦需要縫3針。警方將案件列作行劫，交觀塘警區刑事調查隊跟進，正追緝一名年約30至35歲，身高約1.65米，蓄短黑髮，案發時身穿白色上衣的賊人歸案。今晨11時許，3名探員返回油美苑案發現場調查，翻看停車場閉路電視片段，至今午5時許，一批機動部隊警員到場搜證。