餐廳每張紙巾收一蚊　食客鬧爆：好小器

一張紙巾值幾錢？近日有網民於社交群組「西環變幻時」發貼，指於餐廳自取紙巾後被收取額外費用，大呼「中伏」，更直言不會再光顧該餐廳。

據發貼者表示，當日到西環某餐廳食早餐，由於忘記帶紙巾，便順手拿起放於旁邊座位的紙巾抹鼻水。有餐廳侍應隨即走到其身旁，指「姐姐仔，你一個人用4張紙巾咁多」，發貼者即時反駁，澄清自己僅用了3張。

其後當發貼者去付錢時，該餐廳員工指由於食客用了額外紙巾，所以須多收兩元正，直言「個個人都攞咁多我咪蝕本」。發貼者指當時迫不得已才使用餐廳紙巾，怒斥該名員工態度惡劣，直言「唔使錢都唔會再去受氣」。

貼文惹起不少網民討論，有曾光顧該餐廳的網民指，店內貼有告示標明「自取紙巾每張收費一元」，當時員工解釋指有人曾拿走一疊紙巾自用，希望藉收費減少浪費。惟不少人仍斥其收費無理，指「一包紙巾都係四蚊」、「佢食水都幾深」。對於這間餐廳的做法，你又撐唔撐呢？

---------------

《港呢啲》：大事小事騎呢事，東網電視嚴謹選題，輕鬆製作！