又係妳呀？女司機撞完警車　疑即日再撞的士

小姐，乜又係妳呀？昨日（13日）有女司機於大埔四線轉彎唔夠位直撼警車，惹起網民熱烈討論，未料事件仲有下集！有網民上載另一段車Cam片，顯示該車同日再「出招」，硬撼的士車尾。

據該車Cam片段顯示，一輛黃色私家車昨日(13日)上午九時許，沿大老山隧道往九龍方向行駛，車輛正於收費亭前慢駛排隊，準備付款，豈料該黃色私家車疑收掣不及，撞向的士車尾。

細看車牌，該車正是同日上午八時許在大埔撞警車的黃色車。換言之，該車一小時內先撞警車，再撼的士，令人嘖嘖稱奇！

據警方資料，昨日驅車撞向警車的，為一名女司機。雖然未知在收費廣場「再下一城」的車手是否為同一人，但網民已經議論紛紛，直斥其駕駛技術「恐怖」、「真係唔明點解會考到牌」、「岀色女車手」等。亦有網民笑指該司機應被釘牌，降低香港車禍率。

---------------

《港呢啲》：大事小事騎呢事，東網電視嚴謹選題，輕鬆製作！