政Whats噏:慢必邀返家過夜 周庭願意

20171217
東網電視
更多新聞短片
陳志全力邀周庭返屋企過夜。(葉華英攝)
香港眾志主席羅冠聰今年7月被取消議員資格,政府早前決定喺岀年3月11日進行補選,眾志常委周庭已表明會積極考慮參選填補羅冠聰原有議席,頻頻擺街站,增加曝光率。而喺今日(17日)街站上,人民力量陳志全(慢必)更力邀周庭返屋企過夜,周庭亦願意登堂入室,慢必揚言「同床瞓都唔怕!」
周庭今午喺太古康怡廣場對開擺街站,獲得一眾泛民現身撐場造勢,其中慢必就話自己同工黨張超雄係新界東議員,但二人都係港島選民,所以就叫周庭他日參選記得搵佢哋提名。家住北角嘅慢必,講明願意將屋企變成周庭選舉分部,又話鍾意上嚟擺嘢、上嚟休息,無任歡迎,仲話對佢有信心,就算過夜都無問題咁話!
事後再問周庭敢唔敢上去,她反問點解唔敢?慢必仲話屋企有兩隻貓,唔驚就得,上嚟就算同床都唔怕,而周庭又真係唔怕,仲話好鍾意貓。相反喺隔離聽到呢段對話嘅民主黨許智峯就話「如果係我就怕喇!」慢必笑而不語。
另外,問到參選時若被DQ有否後續計劃,周庭指難以估計政府會出咩招DQ佢哋,但目前傾向簽署確認書。至於其英國國籍,她指正在處理中,相信好快有回覆。同場亦有已被DQ嘅劉小麗同姚松炎,仲有社民連黃浩銘、南區區議員區諾軒現身支持周庭,希望可以重奪DQ議席及守住泛民喺立法會直選過半議席喎。