用不銹鋼飲管　網民憂污糟　茶記︰會逐支刷

東網電視

有茶餐廳使用不銹鋼飲管，贏盡掌聲，但亦有網民質疑衞生問題。（設計圖片）

綠色和平成員爬摩天輪宣揚「走塑」，冀引起港人關注塑膠問題。有茶餐廳老闆則身體力行，將堂食的即棄膠飲管，轉為不銹鋼飲管，獲一班街坊大力支持。不過有網民質疑，不銹鋼飲管不易清潔，容易藏污納垢，餐廳老闆點解畫？

日前社交專頁「搞乜東東」發貼，指發現上環一間茶餐廳的桌上，放着不銹鋼飲管供食客取用。發貼者直言非常感動︰「是我認識的第一間茶記堂食，唔再用膠飲管，我愛你」！

貼文一出，惹起熱議，有人大讚夠環保，並指會去光顧以示支持。但亦有網民憂慮衞生問題︰「我唔信茶記會洗得乾淨」、「啲清潔姐姐邊會同你逐支逐支刷」。

茶餐廳負責人陳先生接受《港呢啲》訪問時表示，留意到網民的疑慮，強調每一支均會細心清理，並正計劃購入消毒櫃︰「我哋會逐支逐支刷，如果繁忙時段都唔會求其處理，真係趕唔切情願用番膠飲管。」

陳先生指，現時正值冬季，較少食客點上凍飲，每支飲管平均每日僅使用一次，着大家不用太擔心，「掂到嘅都係嘢飲啫，唔會好似飯餸咁污糟，咁難洗。」陳先生坦言，若食客仍未能安心，歡迎自攜餐具或向職員要求使用塑膠飲管。

事實上，無論是餐廳或是自己的餐具，均要仔細清理。外國就有網民使用「私伙」飲管兩年，期間僅以清水沖洗，結果裏面積聚大量污垢，即刻去片睇吓有幾恐怖！

---------------

《港呢啲》：大事小事騎呢事，東網電視嚴謹選題，輕鬆製作！

on.cc東網