政Whats噏:譚志源講真話 食咗誠實豆沙包?

20171223
東網電視
更多新聞短片
譚志源把政圈不能說的秘密講晒出口,莫非食咗「誠實豆沙包」?(設計圖片)

今屆政府任內重啟政改的機會不大,已是政圈的公開秘密。政制及內地事務局前局長譚志源成功轉換跑道當選港區全國人大代表後,可能無官一身輕,講到明現屆政府重啟政改落實一人一票選特首嘅機會係非常之微;佢又大談《基本法》第二十三條立法(廿三條),指明至少要等到2020年立法會換屆選舉後,政府先有空間做準備。譚志源把「不能說的秘密」都爆晒出嚟,究竟佢係食咗「誠實豆沙包」定係鬼拍後尾枕呢?

現屆政府上任半年冷待重啟政改訴求,上屆政府的「政改三人組」成員、特首林鄭月娥今日(23日)再次吹淡風,指目前社會已經平穩,經濟又好,重啟政改有機會倒退返去違法佔領行動時嘅局面,社會再次陷入撕裂,市民唔會贊同。林鄭又拉埋立法會嚟講,指近日民主派因為修改《議事規則》一事唔開心,表明會向政府同建制派百倍奉還復仇,所以目前並無有利條件,仲話要等民主派回心轉意肯平心靜氣先至有得商討。

相對於林鄭月娥羅列咁多理由,暗示唔會重啟政改,作為「政改三人組」另一成員嘅譚志源就直接了當,講明2022年未必可以落實一人一票選特首。譚志源話,假如現屆政府喺任期頭兩年都未啟動政改「五部曲」,咁喺5年任期內完成到嘅機會將會極低。佢又從技術角度分析,指香港同內地必須要建立足夠嘅溝通互信,先有較高機會喺法律問題上取得共識。

講完重啟政改,譚志源又大談廿三條立法時機,佢話國際環境愈來愈複雜,為了維護國家安全同主權,香港唔可以成為缺口,而且立法係憲制責任,所以佢認為係2020年立法會換屆選舉之後,政府將會有空間準備相關工作。呢個時間表與其話係譚志源嘅真知灼見,倒不如係政圈嘅主流共識,原因係廿三條立法呢項燙手議題,足以影響選戰勝負,因此喺立法會換屆選舉之後先出台,可避免拖累建制派選情,屆時選戰壓力最輕,建制派就可提供最大護航力度。

政圈公開秘密一籮籮,但普遍被視為「不能說的秘密」,只能意會,不能言明。譚志源當選港區人大代表後,講「秘密」都大聲啲,而綜合佢嘅「意見」,亦與「先廿三條、後普選」的政界共識吻合,唔知佢會唔會繼續公開爆料呢?