政Whats噏：梁福元即將嫁女　恨抱外孫

為人父母最開心就係子女結婚同生小朋友，十八鄉鄉事委員會主席梁福元嘅女兒喺平安夜被求婚成功，梁福元即將嫁女，話相當開心，大讚未來女婿好上進，最想佢哋趁年輕快啲添丁！

梁福元話，平安夜當日，未來女婿喺大棠有機生態園向女兒求婚成功。從梁福元提供嘅照片可見，未來女婿都相當有心思，安排咗多部掛有心形氣球嘅跑車，同埋一架直升機，仲布置咗求婚嘅大型告示牌，上面印有甜蜜合照。

梁福元話，女兒同未來女婿已經拍咗幾年拖，鄉村傳統都係想佢哋趁後生盡快添丁，有老人家幫手湊小朋友，不過一切都係隨緣啦，未來女婿雖然唔係原居民，但住喺新界都可以稱呼做新界人，「日久他鄉變故鄉」，仲大讚佢好上進添！咁聽落梁福元相當滿意呢位未來女婿喎！