政Whats噏︰泛民撳住荷包　DQ四子食自己

每年1月1日由民間人權陣線發起嘅元旦遊行都係各大政團籌款嘅機會。因為社民連梁國雄(長毛)、香港眾志羅冠聰、劉小麗同姚松炎被取消立法會議員資格(DQ)，民主派為DQ四子嘅官司費成立咗「守護公義基金」，舊年嘅元旦遊行各政團都要為基金撲水，但過去1年基金掠水逾1000萬港元，今年元旦遊行大部分泛民政黨嘅吸金力大跌，亦都決定為自己打算，講到明遊行籌得嘅款額將會由各黨派自己「袋袋平安」。泛民各黨派個個撳住荷包，DQ四子食自己都得喇！

守護公義基金喺2016年底由「佔領中環」發起人陳健民、朱耀明等成立，已籌得逾1000萬港元，喺扣除DQ案原訟庭DQ四子嘅律師費後，基金現時存款為540萬港元。雖然嚟緊仲有長毛、小麗就DQ案上訴嘅費用、DQ案政府一方嘅訟費、違法佔領行動9名主要搞手案件等需由基金找數，不過正所謂長貧難顧，各大黨派都已表明，喺元旦遊行中籌得嘅款項都會自己落袋，唔再捐畀基金喇！而基金喺冇泛民幫拖下，今年只係籌得37萬港元。

其實，大多泛民黨派喺今年元旦遊行嘅吸金力都大跌，跌幅最大嘅喺社民連，今年只籌到26萬港元，較舊年籌到嘅40萬港元少14萬港元，而由黃之鋒做秘書長嘅眾志亦只籌得20萬港元，較舊年少2萬港元，民主黨(白鴿黨)同公民黨(公文袋)今年各自籌得約7.8萬港元及8萬港元，而白鴿黨較舊年多咗近2萬港元，公文袋則少咗1萬港元。

泛民政黨喺過去幾次遊行都將籌得嘅款額捐畀守護公義基金，但今次元旦遊行就斬纜。社民連主席吳文遠話佢哋本身都有好多官司喺身，所以今年要就「守護自己公義」，將籌得款項留畀社民連作律師費用。唔止社民連撳住荷包唔放，白鴿黨、公文袋都一樣，就連眾志都話會留嚟黨務用、立法會追討議員薪津同政治檢控案件嘅法律費用。

守護公義基金唔止靠遊行「掠水」，更加係龍門任佢擺，事關原本話籌得款項係支援DQ四子，點知又轉口話要改為幫佔中9子案籌款。咁搞法真係唔知幫得幾耐，難怪大家都抽身走人啦！