政Whats噏：工潮捐款歸黨　李卓人袋住先？

曾將壹傳媒黎智英(漢奸黎)秘密捐款「袋住先」，被踢爆後先交返畀工黨嘅工黨立法會前議員李卓人再惹「袋住先」疑雲。話說李卓人任秘書長嘅職工盟，佢哋嘅「勞工權益基金」早前就為海麗邨罷工清潔工友籌款，仲籌得逾28萬港元，喺扣除工人津貼同罷工開支5萬多港元之後，剩餘嘅近23萬港元就用作日後抗爭用途。有社交網站專頁就發貼質疑職工盟藉工人名義籌款作政黨工運經費，究竟李卓人係食髓知味抑或「袋住先」成癮，搣唔甩呢？

社交網站專頁「生於亂世」今日(10日)貼文，指一直高調協助海麗邨清潔工人追討遣散費嘅職工盟，利用工人名義籌咗23萬港元，最後只向21名清潔工人每人發1800港元，餘下18萬港元捐款卻不了了之，質疑職工盟藉工人名義籌款，但捐贈變成政黨未來工運經費，批評職工盟「等同詐騙捐款人」。

雖知李卓人2014年曾經將漢奸黎嘅秘密捐款「袋住先」長達9個月，係傳媒踢爆之後先至急急將筆捐款交還工黨，今次嘅社交網站貼文隨即引起網民關注，指職工盟「掠水」、「利字當頭」，有網民更留言指︰「李卓人的做法你懂的，你地(哋)越(愈)積極佢就越(愈)富貴！」

職工盟點止籌到23萬港元，佢哋發表澄清聲明自爆「勞工權益基金」實際籌得嘅款額更高，達到28.5萬港元，剩低嘅係近23萬港元至真。聲明又話扣除工人津貼同罷工開支近5.6萬港元後，剩餘嘅22.9萬港元會用作日後嘅工人抗爭，絕不用於職工盟營運開支；而李卓人亦話籌款時已講明餘款會畀基金日後抗爭使用，並唔係畀職工盟，又話海麗邨工人係知悉籌款用途，反指有關講法係侮辱工人喎。

立法會新界東補選3月舉行，工黨主席郭永健有意出戰，但本土派亦都對補選虎視眈眈。工黨郭紹傑就喺社交網站上質疑貼文嘅專頁係本土派搞嘅，疑似質疑本土派搞事狙擊工黨。不過「生於亂世」專頁就反駁係抹黑，澄清佢哋唔屬於任何本土派組織或成員，亦唔係港獨人士，只係想更多人睇到真相，彰顯公義，希望職工盟講得出做得到，將捐款用喺工人抗爭。你一言、我一語，真係一地都係花生殼喇！