新設計累事？九巴車窗多霧氣　工會：好危險

大家朝早搭巴士，有否發現擋風玻璃矇查查？近來有不少九巴車長發現，車頭玻璃出現嚴重霧氣，影響視線，有人甚至要在行駛途中停車，通報作壞車處理。

「連路都睇唔到」，九巴僱員工會主席郭志誠接受《港呢啲》訪問時說，接獲不少車長投訴，指擋風玻璃霧氣嚴重阻礙行車視線，當中以新界區行車路線最受影響，「市區路線可以趁塞車抹吓，一上公路就好危險」。他指有車長甚至於公路上報壞車，安排另一輛巴士前來接載乘客。

郭志誠估計，霧氣問題與部分巴士取消安裝除霧器有關。他指，舊款巴士原本在車頭設有吹出熱風的除霧器，「熱氣向上升可以快速去霧」；但近年九巴新車上的除霧器改為吹冷風，大大減低了除霧功能。而由2015年起的新款巴士更不設除霧器，九巴只為擋風玻璃噴上防霧劑。

郭志誠批評防霧劑只能短暫解決霧氣問題，「過一、兩日就冇用，又冇人手日日噴」。他質疑九巴只顧節省經營成本，罔顧乘客安全。

九巴回覆《港呢啲》查詢時表示，九巴重視行車安全，巴士上設有除霧器，由車長獨立控制。近日天氣寒冷加上有雨，公司已於車頭玻璃塗上防霧劑，以防止霧氣出現，並加強檢查巴士車頭玻璃均塗上防霧劑。但九巴未有回應，是否有巴士並未安裝除霧器，以及除霧器的冷熱風問題。

想知霧氣問題有幾嚴重？去片睇吓啦！

---------------

《港呢啲》：大事小事騎呢事，東網嚴謹選題，輕鬆製作！