搜查線：貴價車厘子變笑口棗？牌子品種要分清

一反早前人人搣柑的情景，油麻地果欄近日人頭湧湧，大家空手而來，然後捧着大盒大盒水果離去。引來不少市民瘋狂搶購的，是來自澳洲塔斯曼尼亞的車厘子。食車厘子當然開心，不過最近有人用200港元買了一盒車厘子，竟發現是「爆口」，外形有如笑口棗，懷疑不法商人混入劣質貨出售。究竟「爆口」背後原因是甚麼，避免遇上這情況，到底要注意甚麼？

一般常見的車厘子有酸有甜，每次要買到、吃到甜的果實，都像抽獎一樣。但果欄水果店負責人阿謙表示，由於塔斯曼尼亞氣侯適宜，種出來的車厘子會較大粒、圓和甜，亦較「實淨」，他亦教路選擇靚車厘子時，要看其表面是否「令」身、實淨、飽滿，以及椗頭是否青綠色：「你見到啲椗變咗啡色、灰灰哋嗰啲，其實已經擺咗好耐。」而一月到二月底，正是塔斯曼尼亞車厘子的當造期。

不過，近日有人在網上指自己以200港元購入一盒塔斯曼尼亞車厘子後，發現三分之二都出現表皮裂開、如笑口棗般「爆口」的情況，懷疑有水果店出售劣質，甚至是假塔斯曼尼亞車厘子。阿謙稱這樣的「爆口」屬乾爆，一盒車厘子一般會出現2、3粒：「因為本身車厘子夠脆口嘅話，佢係會爆。腍身嘅車厘子較少『爆口』，所以你見到『爆口』未必係壞事。不過都要睇你爆成點，如果一盒爆咗一半，咁梗係有問題啦！」

乾爆屬正常，但濕爆就「唔同講法」：「如果濕爆多數係爛咗、夾爛，夾到出汁嗰啲就係濕爆。」阿謙建議市民購買車厘子時，可以開箱，檢查內裏的白色包裝膠袋有否變濕，又或被車厘子的汁液染成紅色，而水果店基本上願意打開紙盒供客人檢查。

除了「爆口」外，塔斯曼尼亞車厘子即使是相同牌子、相同包裝，品種也有不同：「唔同時期出唔同品種，早期啲係Van、Kordia，去到中期可能係Sylvia重有Stella，好似依家咁、未算中尾期嘅呢段時間就出緊Lapins。」阿謙表示，Kordia的色澤較深，味道較重，而Lapins則較「實淨」，暫時會推薦這兩品種。

而不同品種，就算是同一品牌，價錢亦頗有差別，購買時必須掌握到基本價錢：「好似 Stella、Sylvia，2公斤依家最平做到260蚊有交易，但Lapins係講緊330至360蚊，相差幅度都幾大，記住係講緊同一隻牌子喎。」

另外，車厘子大小亦是影響價錢的因素之一，因今年車厘子當造時，即使是最小的車厘子也有26-28mm，阿謙更指他暫時見過最大是36mm以上：「舊年車厘子少嘅時候，咪賣到好貴囉，去到600-800蚊一盒都有。但今年大造，唔單止價錢平咗，而且size更去到34mm以上。」